中年男團Hey Brother集資追夢即將「翻本」，近日工作邀約漸多令他們信心倍添。眾人諗頭多多，不排除「跨界發展」的可能，分分鐘染指時裝及figure界，成功擴張版圖。
藝人曹永廉、麥長青（麥包）、黃智賢、李思捷及唐文龍組成的Hey Brother努力漸見成績。出道約半年，工作開始浪接浪，預見不久將來可以做到收支平衡，甚至「有錢賺」。他們開心透露已有人出資邀拍電影，明年農曆年將拉隊飛到美加登台，年底則先於內地舉行音樂會，似乎「錢途無限」。
對於曾被揶揄「加埋200幾歲」，5子大方回應：「遲來的春天冇所謂㗎，最緊要啱時間啫。以前我哋冇人生經驗，依家家庭及事業經歷過高高低低先啱數。況且又唔係偶像派，已經冇嘢可以打敗我哋，只想大家感受到我哋5個嘅團結，帶多啲正能量畀大家。」麥包更謂：「即使叫我哋大叔都冇問題，感覺親切，好似保護到人哋咁嘛。」
組團之初5子各出動6位數字私己錢集資「追夢」，更坦言曾計劃多多，最終發現「出歌花費最平」，不過阿廉補充：「我哋好有要求㗎，好似第二隻歌《共唱輝煌》咁，我哋前後搞咗幾個月，更因為覺得錄第一Take效果唔係幾好，所以再走入錄音室錄過，又搵咗黃智賢處男填詞，佢程度低但填得好好，哈哈！」黃智賢更打趣：「填得好快，以前我成日改劇本，改得多有幫助，況且已經有基本嘅，我雕吓花啫。」
5子之中要數麥包諗頭最多，李思捷則轉數快。思捷透露：「電影方面我寫咗大綱嘞，等投資方睇完落實之後，我就可以出分場，快起上嚟分分鐘趕到賀歲檔，不過最緊要有質素，唔好搞埋啲噱頭嘢。（想拍乜片種？）喜劇，氹吓大家開心。」他們又不排除日後「擴展版圖」：「好似我哋之前着出嚟嗰件隊服牛仔褸，真係有人話好靚，問我哋喺邊度買，所以可以考慮出服裝品牌。」思捷更指自己美國有朋友於內地開設玩具廠，正考慮推出團隊figure玩具的可能，難怪阿廉形容：「開始種下種子，慢慢生長就會有收成㗎嘞！」
黃智賢髮型：
Hair Culture Willie Chan
本文作轉載及備份之用 來源 source: http://hk.on.cc
|
鍾意就快D Share啦！
|
|
|
