羅家英在2004年確診肝癌第3期，當時切肝保命，其後再於2014年發現肝臟有腫瘤：「14年就係呢邊，又嚟多個荔枝，又喺度，唔係復發，係另外一個地方再生多粒。嗰度冇復發，割咗冇嘢，好，切咗，又冇嘢。」直至2019年，羅家英前列腺組織發現有癌細胞：「咁前列腺（腫瘤）呢就係切除咗喇，切除晒前列腺喇，驗過報告都係冇嘢嘅，點知呢佢有啲嘢潛伏咗喺邊邊，係未曾成形嘅，佢自己慢慢成形，到而家佢成咗形喇，咁先知道。但佢有成咁多粒喺度，係切唔到啦，你都唔知點醫，醫生話得一個方法，就係打女性荷爾蒙。」
羅家英指打女性荷爾蒙針可以抑制病情，不讓癌細胞發展：「醫生話大概8年度啦，你等佢一路撳住佢，但唔係消滅佢，唔係醫治佢，等佢平和，但8年之後就壓唔住㗎喇。咁壓唔住要點呀，就要電療同化療。既然咁樣喇，我今年79歲，8年之後我都八十幾啦，電療化療之後，你畀多三年我呀，咁我嗰時都人唔人鬼唔鬼啦。」他笑言：「咁呢個人生有咩用啫？咁我話咁仲好，我就決定唔會再電療，唔會再化療。」羅家英亦十分豁達，決定在這8、9年內盡情吃喝玩樂！
回顧四度患癌的經歷，羅家英自言為治療癌症而花了不少積蓄：「割，最緊要一樣嘢係，你有冇錢？」但原來他從不買保險：「我唔信保險，咁我唯有儲埋儲埋囉，咁我以前都知道，我冇保險，我一定要有啲積蓄，咁咪使咗佢囉，第二次我又使咗佢囉。」不過他就笑言不是花光積蓄：「都未使晒嘅，仲有啲嘅。我冇叫到老婆幫我㗎，我唔使佢幫呀，千其唔好同佢講呢樣嘢，佢亦都冇講過話幫，佢知道我有，（你啲性格唔俾人幫！）唔係，如果佢願意幫我，我都好樂意嘅。」
羅家英奉勸大家定期進行身體檢查，早發現早治療，目前正在接受治療的他，需要注射女性荷爾蒙壓制癌細胞，但就令他身體出現變化：「個人弱咗，好容易眼瞓，好攰，好唔鍾意講嘢，真係好唔鍾意被訪問，因為訪問不停講嘢。（但我覺得你平時好鍾意講嘢㗎），我都唔係好鍾意講嘢，因為講親都係自己嘢，自己嘢有咩好講。前列腺切除咗之後呢，我個人定咗，淡咗，對於嗰個色字，（即係性慾淡咗？）係喇，冇呀，仲打埋女性荷爾蒙添，更加冇，慣咗，已經4、5年。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
