TVB新劇《俠醫》首播開紅盤，打破今年最高收視紀錄，可喜可賀。事實上，此劇賣點不少，除咗真人真事改編，阿Moon劉佩玥做嘅「地產雞」亦非常出位，成為網上熱話。殊不知，一山還有一山高，丁子朗飾演鄭子誠個仔，唔止同老竇同食一女大玩父子丼，仲係一個賤格無情嘅二世祖，可謂活靈活現，入型入格！
嗱，「地產雞」呢個名堂，並非本欄亂噏當秘笈，而係出自劇中丁子朗把口！其中一幕講到，丁丁知道表哥陳豪想買「騎樓」，千方百計搞破壞「橫刀奪愛」，當中包括利用好冧自己嘅地產經紀阿Moon幫手。
話說阿Moon同丁丁火辣一夜情後，瞓身幫手氹掂「騎樓」業主賣樓，以為可以進升「正印女友」之際，卻因為同事張曦雯，喺買賣合約加入必須保留騎樓嘅條款，最終只能拉倒。阿Moon失去利用價值，丁丁梗係同佢反面啦，點知阿Moon傻到想用二人密照公開關係，結果反被丁丁喺酒吧公然羞辱，親口爆出「地產雞」三個大字！
嘩，網民睇到咬牙切齒，大罵丁丁賤到無倫。呢一幕又令網民聯想起另一經典——《巨輪Ⅱ》吳岱融直斥Ali係「臭雞」嘅「高天鷲GIF」，認為兩者足以媲美，甚至可以取代喎！哈，今次丁丁做奸角都算贏開巷咯。
查實早在《美麗戰場》，丁丁做賤男已做到響朵，劇中佢背住陳曉華偷食，同關嘉敏上床，結果被陳曉華撞破。丁丁非但毫無歉意，仲盡情踐踏女友，「渣」到人神共憤！講真，今時今日做奸角更有發揮，效果仲好過做乖乖仔，丁丁不妨繼續朝呢個方向發展！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
