般奴費南迪斯再成曼聯救世主。(Getty Images)
開季即陷入水深火熱嘅曼聯，周日(21日)凌晨踢出翻身仗，喺開波5分鐘就打多個優勢下，主場2比1粉碎車路士今季聯賽不敗身。曼聯隊長般奴費南迪斯今場入波，係佢成為「紅魔鬼」後第100個入球，成功打救近期壓力爆煲嘅領隊魯賓艾摩廉。
曼聯開波5分鐘即有麥比奧莫單刀，車路士門將羅拔山齊士出迎魯莽將佢踢跌，被球證紅牌驅逐。人多打人少嘅曼聯，14分鐘由般奴費南迪斯接應柏德列多古頭槌二傳，近門鏟入領先，呢球亦係佢第200次為曼聯喺英超上陣，兼係各項賽事入嘅第100球。
曼聯喺37分鐘再入一球，卡斯米路37分鐘接應勞基梳爾傳送射入，但呢位巴西中場喺完半場前鑄成大錯，兩黃一紅離場。下半場10打10形勢均等，車路士80分鐘由查禾查洛巴頭槌破蛋，可惜為時已晚，曼聯堅守2比1勝果至完場。
盛傳再輸就會被炒嘅艾摩廉，賽後可以鬆一口氣：「我哋開局踢得好好，好有侵略性，但卡斯米路將紅牌係自找麻煩，但反而令球員更肉緊，所以反而係好事。般費鬥志好高昂，佢係球隊隊長兼且入波，我戥佢開心！不過大家講曼聯一定唔會講好嘢，所以當我講笑就得啦。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
