美臣蒙特(左)、馬菲奧斯根夏(中)已經傷愈，可以上陣搏殺。(Getty Images)
曼聯將於周日(21日)凌晨英超主場迎戰車路士，今季成績持續低迷嘅紅魔鬼，賽前收到好消息，2位進攻主將馬菲奧斯根夏、美臣蒙特已經傷愈，可以復出上陣搏殺，領隊魯賓艾摩廉戲稱，同班主拉特克利夫會談後，獲對方開出新合約，暗示帥位非常穩陣。
魯賓艾摩廉今季以馬菲奧斯根夏、美臣蒙特、麥比奧莫組成鋒線「鐵三角」，但根夏、美臣蒙特上月底對般尼一役受傷，並缺陣上場「曼市打吡 」，最終0比3不敵曼城。曼聯今輪英超再硬撼另1支豪門球隊車路士，艾摩廉喺賽前記者會透露，傷兵問題已有改善：「馬菲奧斯根夏、美臣蒙特都有入選今場名單，佢哋可以隨時候命，現時只有達洛治、利辛度馬天尼斯唔踢得。」
魯賓艾摩廉被傳媒問到早前同拉特克利夫會面內容，佢講笑話獲得新合約：「拉爵向我提供一份新合約，哈哈，唔係，我講笑，其實只係傾普通事情，佢表示支持我，因為重建球隊屬於長期計劃，佢講咗好多次，今季係我第一季，但並唔係。」艾摩廉似乎想用呢番說話，反擊將會被炒傳聞，佢仲話會堅持用343陣式，即使教宗要求，都唔會改變。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
