歌手陳奕迅（Eason）近日接受鄭裕玲的網上節目訪問，提到他的焦慮症時，他透露已經好了一大半，直言最焦慮的事情是演唱會不能失場：「我點解會去睇醫生係因為嗰次失聲而取消咗個騷，我咁耐以來未試過面對，如果我係啲觀眾我會好失望，其實我不妙咗成晚，我嗰排瞓得好唔好，前一晚第100場，我興奮得滯去得盡得滯，自己又唔夠瞓，後來就失聲，回到香港睇耳鼻喉，發現聲帶係有少少事，但最大問題，一係之前中咗新冠，影響咗神經系統，一係心理心問題，來自壓力，我唔係好驚訝，醫生介紹咗一個精神科醫生畀我睇，好似平常睇醫生咁，開咗啲血清素畀我食，好輕微，我一直食緊藥，食緊半粒。」他稱次試過忘記食藥，原本心情很好，但會忽然間冒出打冷顫的感覺，有種擔心及感到緊張，控制不了自己的心跳。
期間，Eason大談童年往事，他坦承小時候試過被母親追打，他拿着菜刀威脅說：「如果你再追住我打，我死畀你睇。」他澄清因為怕死，所以只是用刀柄，又強調父母從來沒有打他，媽咪更是屬賢妻良母型：「媽咪只係攞住藤條追住我，但從來冇打我，爸爸打過我一巴掌，因為我講粗口，當年7、8歲。（之後冇再講？）大個咗有講，大個咗點會唔講粗口。」他又謂以前不喜歡自己的名字，有想過改為「陳國輝」或者「陳志榮」，又曾用William作英文名。
他講到12歲到英國留學期曾被欺凌，整個人被塞進垃圾桶內，問到如何適應當地？他笑言：「我諗最吸引到我留低係啲女同學，因為啱啱青春期，啲女仔好主動，我係好怕醜，香港機會冇識女仔，去到英國成日有女仔走過嚟話you are so cute。中一開始有女仔約我出去，佢拖住我隻手，我好尷尬，後來佢問我想唔想再出去，我拒絕咗佢，佢又同其他男仔跳舞想引我妒忌，但我一啲都冇，直至佢幾年後發育，我就好後悔，佢後來做咗模特兒。我唔係好多拖拍，7年中學，只係拍咗兩、三次。」
鄭裕玲直指Eason曾有段時間脾氣暴躁，他稱可能因為血氣方剛加上年少氣盛，當年推出《K歌之王》大受歡迎，令他變得心浮氣躁，問到現會否這樣？他說：「依家多咗經歷，我都算冇乜點跌過，算係好好彩，只係身體受傷唔係心靈受傷，以前自尊心真係好強，依家愈嚟愈冇，可能多咗人生經歷。（會唔會覺得自己好叻？）唔會咁諗，只係覺得終於做完喇！」作為樂壇前輩，問到如何看待現今樂壇，他坦言:「覺得佢哋好辛苦，我哋90年代出道，其實好多嘢做，又有好多電台騷，好多歌仕出，依家係慘，個市真係唔好，10年前我已經戥佢哋辛苦，我戥許廷鏗、鄭欣宜、陳柏宇、周柏豪，成個樂壇愈來愈唔蓬勃。」
期間他提到MIRROR：「我上次喺個音樂會演出，見到MIRROR，佢哋好似好勁，我都要Look up佢哋嘅感覺，好似好遙遠，但果次喺個騷入面，成班人問我可唔可以合照，我覺得原來都可以一齊玩，佢哋都係普通人。（有冇貼士可以畀佢哋？）如果你哋熱愛呢件事，你繼續。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
