費查(左)今年7月獲委任為曼聯U18主帥。(Getty Images)
曼聯將於香港時間周六(4日)晚上10點出戰英超主場對新特蘭，根據英國各大主流媒體報道，如果紅魔鬼今場再輸波，領隊魯賓艾摩廉就會被解僱，佢亦承認有下台危機。英國《太陽報》指曼聯已制定應對計劃，一旦換帥，將由U18青年軍教練費查接手擔任看守領隊。
曼聯上場1比3不敵賓福特，今季英超6戰只有2勝1和3負，要求換帥嘅呼聲愈來愈大，出戰新特蘭前夕，魯賓艾摩廉被問到高層有冇保證佢可以繼續執教，呢位40歲葡萄牙少帥話：「我唔關心呢個問題，事實上亦冇人可以作出任何保證，我明白必須贏波提升成續，先至可以令計劃持續落去，如果短期內未能取勝，我可能冇得留任，畢竟曼聯係大球會，有好多贊助商，仲有2位班主。」
近期不斷傳出曼聯正在物色新領隊，頭號人選係水晶宮主帥格拉斯拿，但要喺季中挖角，比較困難，會方可能先聘請1位看守領隊。
據悉曼聯一旦炒艾摩廉，原本打算邀請卡域克回巢做看守領隊，但佢近日有新工作，獲歐洲足協聘請擔任歐聯技術觀察員，所以紅魔鬼準備改為提拔U18教練費查暫時領軍。呢位41歲蘇格蘭名宿出身於曼聯青訓系統，球員時代曾於2002至15年效力曼聯一隊，跟隨傳奇主帥費格遜，捧過5次英超及1次歐聯冠軍等多項錦標，擁有純正紅魔鬼DNA。
費查退役後曾於2020年擔任曼聯U16青年軍教練，1年後晉升為技術總監，直至上年4月被韋確斯取代。費查今年7月獲委任為曼聯U18主帥，可見佢一直同紅魔鬼保持緊密關係，非常熟悉球會情況，無疑係擔任看守領隊合適人選。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
