曼聯近10年首次喺晏菲路贏波。(Getty Images)
周日(19日)英超「雙紅會」，曼聯踢出近年代表作，作客憑哈利馬古尼「絕殺」，2比1擊敗衞冕嘅利物浦，領隊魯賓艾摩廉執教後首嘗英超連勝滋味，有望成為曼聯復興嘅起點。曼聯贏波後升上第9位，只係落後各項賽事4連敗嘅利物浦2分。
艾摩廉上年11月接手曼聯後，從未試過英超2連勝，佢賽前強調「連勝」係球隊累積信心、氣勢嘅重要一環，偏偏上場贏新特蘭後，今場要去近10年未贏過波嘅晏菲路作客。曼聯開波62秒有完美開局，麥比奧莫快速入楔窄角度下射入領先。
利物浦失守後控制大局，加普先後有射門同傳中都中柱，伊沙克單刀又被救出。換邊後「紅軍」繼續狂攻，加普50分鐘射門第3度中柱；78分鐘加普終接應費達歷高基艾沙傳中近門射入，當利物浦想乘勝追擊，曼聯84分鐘就靠死球攻勢，由哈利馬古尼頭槌絕殺。
曼聯自2016年1月後首次作客擊敗利物浦，艾摩廉亦終於嘗到英超連勝，呢位葡萄牙主帥賽後表示：「我諗呢場係我執教曼聯以來最重要勝仗，不過聽日開始就唔再重要。足球有時要講運氣，今場我哋有啲運，微細時刻足以扭轉一場波嘅氣場，但我哋都做好應該要做嘅事。」
馬古尼今場獲選為最佳球員，佢喺曼聯近6個入波「粒粒皆精」，對李斯特城、里昂同利物浦都係「絕殺」，對波圖同甘士比就係極限追平，對葉士域治入波就一箭定江山，艾摩廉賽後大讚：「馬古尼非常重要，佢克服經歷過嘅重重困難，係所有細路嘅典範。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
