曼聯長傳急攻踢法專殺強敵。(Getty Images)
曼聯喺英超「雙紅會」作客擊敗利物浦，施洛賽後埋怨曼聯使用「高Q大棍」踢法，事實上呢種風格正正係曼聯嘅全新戰術。曼聯利用長傳製造混亂去搶「第2點」，數據顯示佢哋今季長傳次數係英超第1，不過有分析指呢種戰術專殺強敵，但唔係捧盃球隊可以依賴嘅踢法。
曼聯作客晏菲路採用低位防守，不斷用長傳畀麥比奧莫、馬菲奧斯根夏做反擊，同近年提倡嘅後場組織踢法大相逕庭。英國《太陽報》數據顯示，曼聯今季有466次長傳，比狼隊嘅464次更多位列英超之冠，幾支傳統勁旅就絕少長傳，曼城只得307次係最少嗰隊，阿仙奴同利物浦分別有350次同366次。
領隊魯賓艾摩廉解釋：「我哋嘅前鋒好有力量，如果搶得贏第2點，就可以即刻組織製造入球機會。當門將控球，大部份球隊都係人盯人，有時根本冇傳球選擇。」曼聯門將辛尼拉文斯喺對利物浦一仗，46次傳送幾乎全部長傳，即使上輪主場對新特蘭，拉文斯44次傳球亦有85%係長傳。
不過，利物浦名宿加歷查指，曼聯呢種長傳踢法只對強敵奏效：「曼聯對親強隊都特別醒，係因為佢哋嘅踢法(長傳)，但我覺得呢種打法唔適合曼聯，因為對住其他球隊佔唔到優勢，尤其主場要主動出擊，呢種踢法會限制佢哋嘅進攻。」
事實上，施洛喺對曼聯賽前已經表示，用「長波」係唔會贏到聯賽冠軍：「我相信近10年、15年至20年，冇球隊係靠長波同搶『第2點』戰術去贏聯賽冠軍，只可以喺對頂級勁旅嗰陣間中採用，拜仁慕尼黑、皇家馬德里、巴塞隆拿，仲有利物浦都唔會咁樣踢。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
