無綫《萬千星輝頒獎典禮2025》將於明年1月4日在澳門舉行，大會昨日舉行記者會公布各大獎項10強名單，視帝、視后方面競爭尤為激烈，不過視帝候選人僅得羅子溢現身拉票，勁敵包括郭晉安、林保怡及黃宗澤統統缺席「讓賽」。之前與郭晉安傳緋聞的陳曉華竟打「開口牌」力推對方「稱帝」，完全不怕男友朱敏瀚打爛醋埕！
今屆視帝方面，大熱《刑偵12》的林保怡、《新聞女王2》的黃宗澤及《金式森林》的郭晉安及羅子溢均輕鬆進身10強，視后則有《新聞女王2》的佘詩曼、《巨塔之后》的宣萱、《俠醫》的張曦雯、《金式森林》的陳曉華及《刑偵12》的傅嘉莉等。至於已離巢的李佳芯憑《麻雀樂團》入圍視后，之前表示保持信心，但如今10強止步，令粉絲大感可惜！
10強名單誕生後，所有票數都會洗牌歸零重新計算，難怪昨日出席記者會的羅子溢、陳曉華、傅嘉莉及張曦雯不約而同表示要努力拉票，羅子溢更搞笑說：「我太太近日去咗做林峯演唱會嘉賓，唔記得提佢叫林峯幫我公開拉票，佢講一句好過我講十句，真係蝕喇！」說到其他對手統統缺席「讓賽」時，羅子溢即謙稱：「因為我選情告急，要珍惜每個機會拉票，一票都不能少！我知道自己未必係大家嘅首選，每人手頭上有3票，希望念在我拍咗咁多年劇，最尾嗰票都畀我啦，畀啲鼓勵我。（你入圍視帝之餘，仲憑《執法者們》入圍男配角喎！）我兩個都想要，頭先樂小姐（樂易玲）話我叫兩飛，我問佢可唔可以兩個都得，佢話點解唔得呀？」對於外界睇好他穩奪本屆視帝，羅子溢坦言《俠醫》收視高企、《新聞女王2》聲勢浩大，故陳豪、黃宗澤及《刑偵12》好戲之人林保怡勝算都相當高。
張曦雯成末代「馬來西亞視后」
今屆頒獎禮取消馬來西亞獎項部分，卻加插大灣區多個重要獎項，換言之上屆的「馬來西亞視后」張曦雯成「歷史見證」，她笑說：「我冇得冧莊喇，得獎後都未有機會去見嗰邊嘅粉絲，希望今年能夠衝擊吓視后寶座！（對手好強？）係呀！所以今日點可以唔出席呢？我覺得自己基本上都麻麻哋，加上呢排成日唔喺香港，仲要冇埋馬來西亞方面嘅獎項喎，平常心，志在參與」談到有指明年無綫劇集產量將會進一步下降，會否擔心工作量大減？羅子溢笑說：「呢件事應該唔會發生喺張曦雯身上，我就機會大啲，佢（工作檔期）Full晒啦，哈哈！所以我要變得主動，爭取每一個機會推銷自己。」
至於兩位首次入圍10強的準視后陳曉華、傅嘉莉同時受訪，對於外界睇好《金式森林》拍檔羅子溢奪視帝，陳曉華即搞笑唱反調說：「宣傳時大家都好鼓勵子溢攞獎，我就問佢哋係咪當我老公（指郭晉安）流㗎？我點都支持安哥，佢應該係子溢最大勁敵，拍完套劇大家都好愛呢個爸爸，好有一家人嘅感覺。好彩我哋角逐提名『成家』冇乜衝突，所有獎項都可以分別投畀我哋家庭成員。（『最佳男配角』投畀《奔跑吧！勇敢的女人們》朱敏瀚？）唔會！『男配』3票投畀《金》劇嘅徐榮、羅天宇，同埋同我有份拍《新聞女王2》嘅何廣沛。（唔驚朱敏瀚嬲？）我驚戲中啲仔嬲多啲！」
陳曉華與傅嘉莉不約而同指今屆視后對手很強，前者更分析：「位位入圍嘅劇種都好唔同，如果想要破碎感嘅咪揀我哋兩個囉，女強人代表就係佘詩曼同宣萱，想型嘅就會揀劉佩玥！」傅嘉莉則指《刑偵12》拍檔張振朗上屆已橫掃兩個視帝大獎，故今次她會瞓身支持同劇的林保怡：「佢係一個非常之好嘅前輩，我對佢非常有信心。（頭先你喺台上講咁耐謝詞，係咪諗緊頒獎禮當晚上台機會唔大？）係㗎！如果當晚入到5強有條籤喺電視螢光幕，已經係最靚嘅畫面。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
