TVB《巨聲3》出道歌手譚嘉儀，於2024年假演藝學院舉行一連三場首個演唱會《Be With You演唱會2024》，點知事隔2年，譚嘉儀個唱竟爆出拖糧至今。負責和音嘅歌手Kasey Pong，日前於社交平台指演唱會團隊至今都未收到酬勞，深感冇助︰「主辦方 Two Ally Workshop一直唔出糧，我哋團隊用過唔同嘅方法都搵唔到主辦人Jelly，佢好似人間蒸發咁，公司都搬咗。其實中途我哋有見過佢幫DJ樂怡同埋姚子羚小姐繼續工作，但畢竟兩位小姐同呢件事係無關，所以都冇去打擾佢哋。但點解Two Ally Workshop爭人咁多錢可以完全冇後果？我到依家都諗唔明。係咪每次爭人好多錢摺咗間公司之後就咩責任都冇？難怪香港咁多詐騙案都破唔到。點解返工要冒住冇糧出嘅風險去做嘢？」
譚嘉儀亦自爆原來都係自己個唱嘅苦主：「我知音樂班底收唔到錢，我都未收到6位數演出費，完全無收過，我都係苦主。」去年3月離巢嘅譚嘉儀，2024年舉行個唱時仍屬TVB旗下藝人，因此演唱會合約由TVB經理人負責與主辦方洽商協議，離巢前佢一直交畀公司追數，但至今都係得個吉：「一直我都有聯絡舊公司，佢哋都話有搵過主辦嘅人，但無回音。到我依家完咗約，都仲未收到條數。」
佢提到一般演出合約，會訂明開騷當日或之前就要收到歌酬，但當日佢全權交畀舊公司負責，自己專心演出。問佢有否進一步行動？譚嘉儀暗示自己追訴無門︰「法律上份約係舊公司同佢簽。要交番畀舊公司追。如果以法律程序追討，以我所知音樂班底已做過，如公司係有限公司，對方又有心唔畀係好難追到。尤其當間公司關閉。」
譚嘉儀亦曾親自向主辦方負責人Jelly追數，對方由拖字訣到已讀不回：「起初話過年就會有，我一直都唔係追自己嗰份先，係幫音樂班底追，但佢一路拖。之後打畀佢唔聽，留言不回。」雖然主唱收唔到錢，但竟然有人「幸運」地獲找數，譚嘉儀續指︰「聽聞有啲收到。以我所知佢係揀人出糧，會畀番佢會繼續合作嘅人。」對於和音Kasey指拖糧嘅主辦人Jelly仍夠膽活躍圈中，仲繼續幫藝人工作，譚嘉儀亦感不忿︰「佢喺呢行仲好活躍囉！我都唔明白佢可以拖大家糧咁耐，仲可以喺呢行運作。」
問譚嘉儀往後開騷，會否收咗訂金或全數酬勞先上台？佢指每次同唔同單位合作都有唔同嘅協議，好難劃死一個格式，有啲客戶可能做嘢前都已經畀哂全數，所以都係睇每一次大家溝通磋商。至於今次事件，佢都係第一次經歷到，當然佢都會繼續追討佢應得嘅報酬。至於用咩方法，佢都要等忙完手頭上工作先再去諗。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
