高爾彭馬細個係曼聯Fans。(Getty Images)
曼聯今季換血漸見起色，近期連續擊敗曼城同阿仙奴後，相隔2年首度殺入英超前4名。據報「紅魔鬼」更有復興瘋狂大計，車路士核心高爾彭馬被爆已成終極目標，呢位英格蘭國腳亦因「思鄉」，表態希望重返曼徹斯特，加盟兒時愛隊曼聯已成唯一選擇。
英國《太陽報》報道，高爾彭馬喺車路士效力2年半時間，仍未適應倫敦生活，經常折返曼市家鄉Wythenshawe見家人同朋友，今季因傷患困難只踢過13場比賽，令佢「思鄉」更嚴重，有意返曼徹斯特踢波，而佢無意再跟哥迪奧拿搵食，加盟細個支持嘅曼聯自然係最佳出路。
報道指曼聯總監韋確斯，一直係高爾彭馬「頭號粉絲」，當年高爾彭馬喺曼城上位，韋確斯就係球隊青訓主管，而曼聯行政總裁貝拉達、表現總監艾列夫等高層都嚟自曼城，全部睇住高爾彭馬大，其中韋確斯就曾預言高爾彭馬係未來金球獎得主，依家有機會收購自然通過搶人。
《太陽報》指曼聯最合適嘅4-2-3-1陣式，「10號」位正係高爾彭馬最佳位置，而且般奴費南迪斯盛傳將喺今夏轉去沙特，曼聯已同意畀佢喺季後以5,700萬鎊轉會費離隊，空缺正好由高爾彭馬填補。依家最大障礙，係高爾彭馬同車路士仲有7年合約，曼聯或要動用破英超紀錄轉會費先有望成事。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
