「宇宙最強」甄子丹新正頭即有好消息公布，其主演的荷里活新片已落實開鏡日子，稍後更會拉隊來港拍攝，向全世界宣揚香港特色及美景。身兼多職的他雖然承受不少壓力，但堅持愈戰愈勇，不負「中國香港電影人」身份！
動作巨星甄子丹過去1年半不常露面，但未有閒下來，除了陪伴家人、抽時間練網球及劍擊外，更擔任了數個國際電影節的評委，其餘時間則準備開拍荷里活電影《殺神John Wick 4》外傳《Ballerina》，該片目前已落實約於4月中後在歐洲正式開鏡。
子丹對傳揚功夫電影一向不遺餘力，對「自家出品」更力求一絲不苟。據悉，農曆新年前他已先行前往歐洲為電影睇景，希望今次能將「西片不常見的背景」加插在片中。與此同時，為推動香港影業復甦， 稍後他將拉隊前來拍外景，台前幕後預計會留港數周進行拍攝。據悉，喜歡接受挑戰的他今次身兼男主角及導演之職，作出從影以來的一大突破。
孭重任超越自己
對於獲著名荷里活電影公司委以重任，子丹受訪時坦言：「要兼顧主演同導演，真係好大工作量，而作為一位中國香港電影人，能夠有咁嘅機會，獲得外國公司嘅信任，我感到好榮幸及興奮，希望全世界都睇到我哋拍出一部觀眾喜歡嘅作品。」他更謙稱今次有一定壓力：「係自己畀自己嘅，我要諗清楚點樣可以超越自己，呢樣係性格使然，有朋友勸我減低對自己嘅要求，但如果係咁就冇意義其實每次有新任務，能夠突破就好有成功感，呢樣嘢唔係身價片酬可以衡量嘅。」
子丹坦言希望將電影藝術推上一層樓，並將動作電影推廣到新境界，以達成自己的使命感，他作出預告：「今次我要喺一部英語電影由頭帶到落尾，成與敗真係睇我一個人，無形中我要帶住故事向前走，只要有少少唔完美，都會將整體分數拉低。同埋我有私心，想將東方精神透過呢套戲傳遞到全世界，所以希望做到滿足商業要求，同時亦對得住自己。」
談到近年似乎刻意減產，子丹直言：「其實早幾年已經想減，坦白講，我可以接多啲戲嘅，但又未有新構思，呢啲絕對唔關製作大細嘅事，係對唔對得住自己同埋動作電影人嘅身份。我好想將自己識得嘅技術同智慧分享及傳承落去，所以要諗清楚、搵到新指標先拍就最好。」問到可有退休的念頭，他坦言： 「其實都有諗過，但覺得仲有激情與能量，自己亦有好多諗法想實現，加上手頭上有兩個未公布得嘅Projects，又想拍《導火線2》同《葉問5》。有啲嘢唔能夠預測，亦唔可以一口咬定，隨緣啦。」
回看早前看似「放空」的日子，子丹對人生有新領悟：「明白到人生意義係要尋求真正嘅幸福快樂， 年紀大咗更要珍惜，生命時鐘可能已經倒數中。生命好脆弱，做每樣嘢最好盡情去做，投入就自然搵到快樂。」他直言個性緊繃，但已受太太汪詩詩的樂天感染：「人會有唔開心，依家我逐步去控制情緒，而太太就令我開竅，想明白佢點解可以咁開心同充滿正能量。」
場地提供：上環文武廟
本文作轉載及備份之用 來源 source: http://hk.on.cc
|
鍾意就快D Share啦！
|
|
|
