藝人傅嘉莉跟馬兒齊齊影靚相賀新春，去年入圍視后的她預告今年將有不少新作，又會挑戰唱歌，笑言瞄準年尾的「飛躍進步獎」。而今年完成寶石學學士課程的她將第一次戴上四方帽，相信馬年會過得非常豐盛！
傅嘉莉（Kelly）是愛驅之人，她趁今年馬年，特別跟馬兒拍了一輯靚相應節，並以3個不同造型亮相。其中以大露背裙最吸睛，她稱學習騎術已有一段時間，後來因疫情而中斷，望今年可重拾策騎樂趣。說到最難忘的農曆新年，Kelly自覺是今年，因為她在毫無預警下又當上「奴才」了，她表示：「我今次唔係做貓奴才，係做狗奴才。上年身邊兩隻至愛貓貓離開我，本來以為永遠唔會再養寵物，中間都玩過Tamagotchi去調劑吓心靈，但始終同活生生嘅寵物好唔同。所以今次都有少少衝動，又做媽媽可能人生就係咁，唔可以計劃太多，想做就去做。」
除了照顧愛犬外，Kelly還要為過節作準備，相當忙碌，她說：「我對新年傳統習俗跟得好足，年廿八之前一定會大掃除，我已經捐咗兩大箱衫，花幾日由內到外清潔屋企，煩惱同污糟嘢一併清走。年廿九會早啲沖涼，過咗12點就唔沖，等到年初二先再沖。初一一定去媽咪屋企逗利是，呢封利是我會擺喺銀包足一年，當係好運利是。」
談到去年運程，她以「超級幸運」來形容，因為去年播出了她很喜歡的一套劇集《刑偵12》：「做到好喜歡嘅角色楊芷菲，同優秀嘅演員合作，亦都可以繼續出席台慶頒獎禮，入圍2025最佳女主角，對我嚟講係事業上好大嘅進步。」對於馬年展望，Kelly望憑新劇《玫瑰戰爭》中的角色引起大家共鳴，她笑言：「我劇裏面個角色叫梁菲雅，個名同《刑偵12》一樣都有個『菲』字，希望可以再次帶到角色入去大家心入面。」
她又透露新年後會開拍另一套新劇，除了劇集外，Kelly今年有新嘗試，有機會試唱片尾曲，4月份會到加拿大登台，現積極練習歌唱技巧。在工作以外，她於去年開始修讀寶石學的學士課程，預計今年8月正式畢業，迎來人生第一次戴四方帽，令她大感期待。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
