卡斯米路(左)已經落實今季結束後約滿離隊。(Getty Images)
曼聯中場卡斯米路已經落實今季結束後約滿離隊，去向備受關注，根據英國《太陽報》最新爆料，呢位即將34歲嘅巴西國腳近日前往美國佛羅里達州渡假，順道實地視察當地環境。美職球隊國際邁亞密主場位於佛州，令人聯想卡斯米準備加盟呢支勁旅，同阿根廷球王美斯做隊友。
由於曼聯喺英足盃一早出局，因而有接近兩星期空檔冇比賽，唔少球員趁機外遊，卡斯米路同太太飛去佛羅里達州，消息指呢位球星今次美國之行，除咗渡假之外，亦希望了解當地生活環境，最緊要睇吓老婆啱唔啱心水。
國際邁亞密大本營位於佛羅里達州，盛傳會方計劃簽入卡斯米路，接替上季結束後掛靴嘅布斯基斯，佢今次現身佛州，有可能順道去同國際邁亞密管理層見面，傾加盟事宜。班主之一嘅碧咸同卡斯米路都效力過曼聯同皇馬，相信兩人特別啱傾，有望促成佢來投。卡斯米路為巴西踢完今屆世界盃後，亦可以留喺美國搵食。
國際邁亞密近年頻頻簽入球星，包括兩位神鋒美斯、蘇亞雷斯，搵埋卡斯米路加盟，並唔出奇，如果成事，卡斯米路就會成為第28位同兩大球王美斯、C朗做過隊友嘅球員。
除咗國際邁亞密之外，卡斯米路嘅母會聖保羅向佢開出2年合約，有C朗助陣嘅沙特阿拉伯豪門艾納斯亦有意爭奪卡斯米路。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
