高爾彭馬今仗上半場射入3球。(Getty Images)
周六(7日)晚英超，車路士作客以3比1擊敗狼隊，高爾彭馬上半場射入3球，成為英超史上首位3次上半場上演「帽子戲法」嘅球員。近期盛傳彭馬「思鄉」想返曼市生活，曼聯計劃今夏收購呢位23歲英格蘭國腳，彭馬霸氣回應，指一切小道消息都係廢話，並無意落「車」。
包尾大幡狼隊今仗連番「送禮」，開賽13分鐘，馬特杜靴迪喺禁區內踢跌祖奧柏度，被判罰12碼，高爾彭馬主射入網。跟住35分鐘輪到另1位狼隊後衞耶辛莫斯基拉禁區內犯規，推跌祖奧柏度，再次被判罰12碼，又係由高爾彭馬操刀射入。
僅過3分鐘，高爾彭馬射成3比0，職業生涯第3次英超上半場入3球，成為「半場帽子王」，同時超越林柏特、哈索賓基、杜奧巴，以4次成為車路士史上最多次英超「戴帽」球員。
狼隊下半場靠艾洛高達尼入波破蛋，無阻車路士取得英超4連勝，落後第4位曼聯1分。高爾彭馬當選今場最佳球員，並否認成「魔」傳聞：「好多人鍾意講廢話，但我會選擇忽視，我現時處境非常好，狀態正在提升，羅仙尼亞係1位出色領隊，佢令我哋充滿自信，畀好多空間球員自由發揮。」羅仙尼亞成為史上第2位教波生涯首4場英超領軍全勝嘅英格蘭籍主帥，另1位2017年嘅格力沙士比亞。
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
