藝人張栢芝18歲大仔謝振軒（Lucas）於澳洲升學，日前，栢芝飛抵澳洲悉尼陪伴Lucas，並打點兒子新居的一切，日前有網民於悉尼大型連鎖傢俬店遇到栢芝跟Lucas一齊揀傢俬，栢芝戴上口罩、帽包到冚，Lucas則休閒打扮，連口罩都無戴，兩人在傢俬店周圍逛兼密密斟，並於店內快餐店吃東西，栢芝更指最愛吃蒜茸包以及肉丸。
栢芝於社交平台都有分享自己變身「裝修工人」的短片，指自己凌晨4點幾便起身，清晨6點左右便「開工」為兒子新居打點一番，她謂：「今日拆傢俬都有排拆，間屋好多嘢買，真係暈低。」在短片所見，全屋以黑、白、原木色為主：「男仔吖嘛，咁樣型吖嘛。一間屋真係好多嘢買㗎，乜都係錢啦。」她特別從香港帶花灑頭到澳洲，並指該花灑頭勁好用。
除了添置家居用品，栢芝還在兒子家放了印有自己相片的月曆，並笑謂：「大家係唔係覺得我自戀狂，擺自己個月曆喺個仔屋企呢？係我個仔堅持要擺，仲要我send一張好大嘅相畀佢掛喺牆度。」經常被指凍齡有術的栢芝，在短片中還自爆要戴老花眼鏡：「安裝燈座，我冇戴老花（鏡）啊，3粒螺絲幾難鑲啊！」最後花了15分鐘終於完成。她又謂：「好多謝我個仔畀我幫佢搞個屋企，唔係咁多小朋友畀阿媽搞㗎，（笑）其實唔係，我冇問過佢，哈哈！」
當介紹到屋入面的電視櫃，栢芝直言：「我哋傾咗好耐，商討咗要一個價錢屬中價嘅櫃，最多唔可以超過400蚊（澳幣），跟住我哋就揀咗呢個300幾蚊嘅。我哋自己去貨倉抬，因為唔想等送貨。」最後，張栢芝和Lucas合力安裝傢俬，栢芝亦有親自做家居清潔，直言「攰爆」：「我今日收工喇，我呢個清潔阿姨收工喇。」
另外，Lucas被目擊坐地鐵，身邊有女伴同行，網民指Lucas並冇因為星二代身分而有架子，同普通留學生無異，自行乘搭公共交通工具，貼地生活令媽咪被盛讚教子有方。18歲嘅Lucas氣質愈發成熟穩重，眼神銳利，鼻樑挺拔，非常靚仔。
據悉，Lucas入讀澳洲音樂學院（Australian Institute of Music），主修音樂專業。早前有指他被雪梨大學同AIM取錄，最終選擇AIM，該校是澳洲最具聲譽的音樂學府之一，曾培養歌手Vera Blue以及著名小提琴家James Cuddeford。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
