卡域克執教曼聯首次輸波。(Getty Images)
卡域克神話破滅！換帥後成績起飛嘅曼聯，周四(5日)凌晨英超慘遇滑鐵盧，喺超過半場打多1個情況下，作客被紐卡素絕殺輸1比2。「紅魔鬼」輸波後仍然排喺第3位，但同第5、6位嘅車路士、利物浦只差3分，下屆歐聯入場資格爭崩頭！
紐卡素開波冇耐，就有捷比亞一次半傳半射中柱，曼聯亦有明奈遠射，被蘭斯達爾飛身救出；上半場補時出現戲劇性發展，紐卡素嘅積及藍斯禁區內插水博12碼，被球證出示第2面黃牌趕出場；踢少個嘅紐卡素，轉個頭又靠安東尼哥頓博到12碼，佢親自操刀射入。
曼聯隨即作出反撲，喺補時9分鐘由卡斯米路接應般奴費南迪斯罰球頂入，半場踢成1比1平手。換邊後曼聯攻勢較多，但逃唔過蘭斯達斯五指關；去到90分鐘，主隊後備上陣嘅韋利安奧索拿右路狂爆，殺入禁區射入世界波，為紐卡素絕殺贏波。
卡域克兩度執教曼聯以來，頭10場賽事取得8勝2和佳績，被睇好有力「坐正」，但今場就首嘗輸波滋味，佢賽後表示：「我哋輸咗1場，而且踢得唔好，但整體嚟講球隊仍然處於唔錯嘅位置。今場結果令人受傷，但係下場一定會更好，曼聯係支好球隊，絕對有能力做到。」
曼聯季初對愛華頓，又係大部份時間踢多個之下輸波，佢哋依家同阿士東維拉同得51分，分別排第3同第4位，壓住48分嘅車路士同利物浦，即係由第3至第6位只差3分。英超前4名可獲下屆歐聯資格，而第5位亦極大機會透過「歐洲賽系數」拎到外卡參賽權。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
