歌手方力申（小方）入行26年首踏紅館，舉行一連兩場《最佳時間》演唱會，昨晚（16日）尾場完滿落幕。第一場觀眾入座僅8成，不過尾場已近全場爆滿，觀眾反應十分熱烈，小方落力演出一度感觸得眼泛淚光。
小方直言紅館夢原本放低了十幾年，如今在父母、太太、女兒、細佬及契媽契仔女見證下圓夢，不枉被人揶揄了26年「万刀甲」（冇出頭）。他說臉皮薄及玻璃心，所以不敢叫朋友來睇騷，但內心其實好想邀請朋友來，他估計尾場「認識我或者我細佬嘅冇1,000也有800人」包括以前中學校長和班主任等。他說：「第一晚收到好多人問點解個位咁後？其實坐得遠係我最錫嘅朋友，坐近位係最錫我嘅朋友，最前係科水贊助嘅朋友，就好似我啲歌，究竟鍾意愛人感覺定被愛感覺多啲？」
小方演唱期間多番走到觀眾席握手及自拍，與觀眾打成一片，又貪玩試過收埋樂迷的手機攝入自己心口大整蠱。小方媽媽睇得極High，站着抱着孫女Isla，小方細佬之後接手抱B，有觀眾走近圍住拍攝B女，搶去爸爸風頭。
開騷前方力申在社交網透露不慎「閃腰」受傷，要做物理治療急救，現場唱快歌《万刀甲》時他又唱又跳，腰力驚人顯然條腰已康復。他在台上解釋受傷過程，笑言「真男人條腰好易閃親，天氣轉涼，着褲時就閃咗一吓，要去做物理治療，綵排時都冇跳舞，好彩冇事。」
尾場嘉賓是楊千嬅，小方表示之前做巡迴演唱會，每次都會唱千嬅的《可人兒》，事緣2001年千嬅開拉闊邀請了當時是新人的方力申做嘉賓，是他第一次上台面對觀眾唱歌，所以好感謝千嬅給予機會，他說：「我第一次奉獻畀你，所以今次一定要請你做嘉賓。」大銀幕播出當年片段，千嬅立即喊驚，「我驚啲，你就唔驚，你個樣都冇變。」小方自嘲「台風就冇變。」2人並即場合唱一次《可人兒》。千嬅表示懷念以前金牌的日子，開心小方每個階段自己都參與了少許，所以收到邀請冇理由推辭，她說：「我係好感動，佢由飛魚王子，現在變成培育飛魚嘅老師，呢個運動員的堅持精神好值得我去學習，人要進步係要堅持和相信。」小方又說到上次帶住大肚太太去捧場睇千嬅演唱會後不久便生產，BB早了一個星期出世，千嬅笑說：「唔關我事呀！今日見到你太太和女係好幸福嘅事。」千嬅表示未出場前聽到小方的《生活無小事》好感動，覺得由可人兒變傻孩子的路不容易，即興清唱了一段，然後她獨唱《野孩子》送給小方。
小方透露今次開騷收到88個花籃，他說：「我成就解鎖，儲齊四大天王花籃，好鬼勁，好榮幸。」及開心可以在紅館名冊上留名。Encore環節，小方找觀眾一齊合唱《自欺欺人》，其中歌手陳慧敏竟被考起，幾乎完全唱不到。臨完騷小方表示收到的恭賀訊息比結婚還要多，拋下一句「你哋咁支持，應該好快有下一次。」全場歡呼。
方力申騷後受訪，提到頭場入座8成直言擔心，他說：「因為加場啲飛冇去得咁快，係擔心，不過主辨和屋企人都話唔緊要，今次係里程碑，叫我盡量享受舞台做好自己就可以。」第一場上台前一刻好激動，望着合作廿幾年的髮型師大家都好感動，台上感謝父母都有流淚，能完成紅館夢感覺好神奇。自評已盡了力，對於太太讚他做出101分？他說：「太太都啟發咗我，太太同女有睇總綵排，感覺到由運動員轉營做藝人，廿幾年之後上紅館，所有努力成就今次紅館騷，而呢度唔係終點，我就攞咗佢呢番說話同大家分享。」
小方今次為演唱會操練到十分健碩，為了除衫找數，他說原本再瘦一點，但太瘦無力唱歌，後來回復正常飲食增磅了兩公斤，最緊要健康，希望可以維持身形。至於老貓燒鬚閃腰受傷一事，他表示中西醫治包括整骨和物理治療醫治，及食了好多止痛藥打底，若然繼續腰痛的話，笑言「唔跳舞，淨係除衫囉！」但他展示右手背有大片瘀青，估計是按地做彈跳動作時弄傷。
至於再開騷的計劃，他表示台上只是說笑，今次開騷做了兩首新歌，估不到《生活無小事》大家很喜歡，近日還上了流行榜第二位，他說：「係人生第二首歌上第二名。」前度鄧麗欣表示冇收到小方邀請做嘉賓一事，小方表示：「騷完仲問？（Stephy有冇傳訊息畀你？）唔講冇回應，（太太唔鍾意？）唔係。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
