歌神陳奕迅前日以「盲盒嘉賓」身份玩轉電台，潛入直播室令一眾DJ尖叫連連！他受訪時大爆鮮為人知的趣事，例如曾想自製星光大道的明星手印、在印度遇見「李嘉欣」等，更自爆因為無緣參演《特警新人類》而耿耿於懷，十足上演棟篤笑。
歌手陳奕迅（Eason）前日應DJ雲妮邀請，以神秘嘉賓身份亮相森美主持的電台節目《Bad Girl大過佬》。他踏入直播室前鬼鬼祟祟，在門外偷望又扮型擺甫士，然後紮紮跳突擊現身，令在場DJ驚喜大嗌，身為粉絲的Elsie更激動落淚。節目中，他發揮搞笑本色：「好多年冇去尖沙咀，間五星級酒店原來係咁樣，夜景係咁靚，行咗去星光大道拍手印。（搵自己手印？）我冇，不過真係有諗過（自製），唔係鑲螺絲嗰啲，係黐上去可以搣嗰啲！我拍咗劉青雲手印，佢手掌好大，古天樂就手指好長。」又透露有參觀「華星大師姐」梅艷芳的銅像，發現似乎有點氧化，又說：「李小龍個像我都望咗幾十秒嘅。」
重提印度𥄫女
森美重提約30年前和Eason及楊千嬅到印度探訪的往事，Eason說：「梗係記得啦，我見到『李嘉欣』，不過重點係呢個印度版只得7歲，我仲有同你（森美）講，因為嗰次只得你一條仔。」森美即揶揄他𥄫女：「你生女就啱呀！」問到若拍戲，想挑戰甚麼角色？Eason表示想做台詞和動作戲份少的殺手：「拍動作戲好攰㗎！」他又為當年無緣參演《特警新人類》而耿耿於懷：「導演搵馮德倫、吳彥祖呢啲靚仔都算，但有李璨琛都唔搵我喎！（你都有追求？）追求大家都有，你問吓張學友想唔想做偶像派？我好被動，隨緣啦。」
另外，同為節目DJ的黃正宜雖然在紐約休假，但她甫落機就直衝電台，成功攬實偶像Eason合照。當Eason離開電台時見粉絲暴曬等候，即提醒他們要撐傘慎防中暑，網民大讚：「被暖得一直在回味。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
