馬菲奧斯根夏(右)今場射入2球。(Getty Images)
周六(20日)早上世盃C組次輪強弱懸殊之戰，巴西變陣成功，派出曼聯前鋒馬菲奧斯根夏擔任正選，佢不負所托射入2球，加上雲尼斯奧斯祖利亞連續2場建功，以3比0大勝海地，取得今屆首場勝仗，並憑較多淨得球，力壓同得4分嘅摩洛哥，升上小組榜首。
巴西上仗僅打和摩洛哥1比1，表現備受批評，主帥安察洛堤今仗對正選陣容作出2個變動，用馬菲奧斯根夏取代伊戈泰亞高，右閘位置用34歲老將丹尼路雷斯頂替羅渣伊賓尼斯。開賽12分鐘，巴西翼鋒拉芬夏比洛尼射門入網，但因為越位被判無效，呢位巴塞隆拿球星仲有1次單刀起腳唔中目標，但同時亦越位在先。
踢到23分鐘，巴西終於打開紀錄，雲尼斯奧斯祖利亞殺入禁區勁射，被海地門將柏施迪撲出，中堅迪克萊斯出腳解圍，卻省中馬菲奧斯根夏反彈入網。
馬菲奧斯根夏首個入波有些少拖泥帶水，佢喺36分鐘堂堂正正入波，接應雲尼斯奧斯祖利亞妙傳，入禁區左路勁射入網，個人梅開二度，協助巴西領先2比0。不過，巴西亦遭受打擊，拉芬夏比洛尼受傷退下火線，由19歲新星拉恩域陀入替。上半場補時，雲尼斯奧斯祖利亞單刀射成3比0，連續2場有波入。
由於大局已定，換邊之後，巴西放慢比賽節奏，海地趁機搶攻，踢到63分鐘獲得黃金機會，中堅列卡度阿迪迎頂角球，勁度十足，但被巴西門將艾利臣比加撲出。巴西亦有杜格拉斯山度士勁射高出。踢到77分鐘，後備上陣嘅安迪歷射門入網，但因為越位食詐胡。補時海地中場當明尼基西蒙遠射，又被艾利臣比加飛身撲出，注定無法破蛋。
巴西維持3比0勝果，2戰取得1勝1和，反觀海地2戰全敗兼冇波入，成為今屆首支出局球隊。
免費玩Game、砌最強11人，一鍵share畀FD子打牙骹：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
