無綫《2026香港小姐競選》今日（10日）舉行第二輪面試，「專業學霸」李子宛（Lily）上次走親民貼地路線，今次再見人就有變樣之嫌，曾於網上發表「容貌焦慮」言論嘅佢，今日皮膚好過上次，佢話有睇中醫調理，不過就奇在佢鼻樑格外筆直，令輪廓更見突出。佢向現場記者表示同上次首輪面試嘅另一參加者溫思婷friend咗，好傾，未正式入圍先「友誼小姐」上身。
而Lily口中嘅溫思婷早前獲封「深圳古佩玲」，係內地社交平台擁有逾200萬粉絲嘅百萬網紅，佢今日以低胸拖地晚裝戰鬥格上陣，表示開心入到第二輪面試。問到有冇信心入final？佢就表示會加油，依家努力學廣東話，更大晒成果：「蕃茄醬，牛腩麵。」非常可愛。
另一位上次一見人已成大熱人選嘅韓其格（Aurora）再次現身，狀態繼續大勇，比上次見人時更見富貴，自爆戴住爸爸設計嘅首飾示人。被指神似視后楊茜堯，因而獲得「高挑楊茜堯」美名。今次佢就好識做，表示自己好鍾意楊茜堯，係佢偶像。同樣為大熱嘅李澤欣（Scarlett）第二次見人，佢自爆仲有7分緊張。
被爆獲著名時裝設計師何國鉦提名嘅林穎彤（Winnie），曾做童星、曾參與《缺宅男女》及《衝上雲霄》拍攝獲關注，今次立即着住何國鉦贊助嘅戰衣示人，指「伯樂」何國鉦冇特別畀貼士，又否認係對方世侄女。
23歲參加者廖紫珊（Xenia）以一身背脊開叉設計連身短裙上陣，表示自己係文員，今次仲係好緊張。當被問到着呢套戰衣去面試好性感時，佢就話：「都唔係好性感啫。」另外，26歲、準備碩士畢業嘅梁倩瑩及19歲黃薇亦同樣入圍第二輪面試，黃薇表示先去電視城時曾一度被拌腳，好彩冇整親，佢自己唔太習慣着高踭鞋。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
