公鹿球星「字母哥」安迪杜甘普（Giannis Antetokounmpo）與兄弟首度訪港，日前人氣偶像MIRROR成員姜濤低調現身，單獨Meet偶像，估唔到尋日（10日）佢再聯同其他3位成員Ian（陳卓賢）、Edan（呂爵安）同Stanley（邱士縉）一齊現身《Antetokounmpo Brothers Hong Kong Tour》活動，同「字母哥」及兄弟大玩射波遊戲，4子見到NBA球星超興奮，笑言見到四位「高人」要考慮退出球壇。
Stanley甫見偶像「字母哥」即跪地膜拜，興奮到彈彈吓，其後喺「Knockout」環節更射贏偶像，即刻開心到喺社交平台話呢單嘢要寫落CV。Edan喺射罰球環節時使出「擾敵政策」，不斷向字母哥兄弟耳邊吹氣，但兩人嘅身高差變「天然屏障」，當姜濤得悉後爆笑反問：「你吹到咩？」。姜濤完場後同Edan 1 on 1，手風唔錯頻頻入球，另Edan同學生比賽時以精準3分波完結賽事，型爆。此外，Ian喺射罰球表現出色，激發「字母哥」哥哥Thanasis Antetokounmpo喺佢面前「入樽」，令全場嘩聲四起。
適逢Ian 9日正日生日，3位兄弟唱完又唱生日歌，仲嗌埋全場工作人員齊齊高歌。講到姜濤同Ian即將開騷，會唔會分外錫身？Edan踢爆姜濤冇就住，Ian仲大爆姜濤整親自己手指，撒嬌即場展示「傷勢」，雖獲姜濤摸摸呵番，佢都勸姜濤要錫身啲：「我仲要彈琴，彈結他，右手揸mic ，但我相信會迎刃而解，會提供到好好睇嘅show畀大家睇 ，呢啲少少挫折係無問題嘅」。此外，姜濤劇透澳門騷會有新表演，Stanley即嗲住要求姜濤包直升機請大家去睇騷，4子對話非常好笑。
另外，尋日大批Hellosss（Ian粉絲名）聚集於Ian生日應援地點打卡，過百名Hellosss自發性合照，場面震撼。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
