尹景順看淡網民負評展現超然心態
從盲選演唱《身騎白馬》起，他獨特的聲線既收穫無數讚賞，卻同時引來部分網民尖酸刻薄的負評。面對兩極化的聲音，尹景順展現出超然心態，坦言不會逼任何人聽自己唱歌：「我成件事我都睇到好平淡。即係，你鍾意，我真係好感激……咁唔鍾意我嘅人呢，其實我都唔會逼你去聽我唱歌嘅，因為大家都係成年人啦，自己鍾唔鍾意聽，或者喜唔喜歡都係自己要去選擇啦，人生係自己，唔需要因為人哋嘅一句話而令自己唔開心。」
重提十年前《華星2》得失心重受打擊
尹景順坦言自己骨子裡其實頗為自卑，過去甚至曾建立過「世界上無人會喜歡我」的保護防線，因此只要有一個人支持便已萬分感激。他以食嘢作比喻，認為有人喜歡食魚亦有人喜歡食雞，無法勉強別人改變喜好。回想十多年前遠赴台灣參加《華人星光大道2》時，他曾因得失心太重及外界批評而陷入深刻懷疑，連歌都不想再唱。如今歷經歲月洗禮，他已學會放下執念：「嗰陣聽到人哋唔鍾意我，或者唔鍾意我聽歌嘅時候呢，就會好傷心，嗰陣得失心好重，好好好想贏……長大咗之後發現，點解我要為咗呢啲嘢去整到我自己唔開心呢？因為唱歌始終係我最鍾意嘅嘢……點解要因為一次嘅失敗，或者一啲人嘅唔鍾意，而唔鍾意自己呢？……變咗我而家嘅尹景順啦，即係冇咁容易俾人傷害。」
尹景順早在十多年前就遠赴台灣讀書兼發展，他自爆曾因工作問題而患上抑鬱症：「我係非常非常之嚴重，即係我可能一日入邊係會諗十幾次要點樣自殘，或者點樣去自殺呢件事。咁呢件事發生咗，我覺得咁唔得喎，咁我要睇醫生啦。咁我睇咗醫生啦，食咗一日藥之後，我又覺得，唔得喎，呢啲係心理問題嚟嘅，我一定唔可以繼續食藥。咁我就由台灣呢完全搬返去馬來西亞。即係2016年嘅時候啦，我就開始呢，唔畀自己諗咁多嘢。因為我覺得，係好恐怖嗰種感覺，即係你成日覺得你自己唔想喺呢個世界，嗰種自卑感。點解會講2016嘅時候，我同而家嘅心態一樣，因為嗰時候我已經帶住我呢個諗法，就係唱好隻歌就好啦，比賽呢樣嘢，淨係要畀大家聽到我唱歌。所以我覺得而家嘅我係可以做心理輔導師嘅一個人。因為自己都已經經歷過，或者可以講，已經完全走晒出嚟。不過我係因為有過抑鬱症嘅人，其實個底都喺度，有時候我都會幾傷心，但係會嘗試轉念囉。即係諗其他嘢，去搞返好自己嘅心情。」
表面堅強內心感性脆弱「睇卡通片都會喊」
擁有豐富比賽經驗的他，如今早已修煉出一顆「百毒不侵」的強大心臟，但堅強背後依然保留著最真摯的感性。尹景順笑言自己表面上雖然越戰越勇，實質上也是個內心脆弱、極易被感動的人，他深情剖白道：「其實我都算非常非常堅強嘅人，但係呢我都係好脆弱嘅人。點解會講自己好堅強呢？其實好多人表面上越堅強嘅人，其實佢心底就越脆弱，我其實係好鍾意喊嘅人，睇卡通片都會喊嘅嗰種人。」歷經十年追夢波折與心理蛻變，如今的他卸下心理負擔，準備以最坦然、最享受的心態迎接總決賽之夜。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
