無綫藝人黃翠如與蕭正楠嘅寶貝仔「蕭哈哈」轉眼已經一歲半，尋日（7日）獲媽咪黃翠如晒出囝囝首次一家三口搭飛機去馬來西亞嘅影片，記錄「蕭哈哈」第一次飛行體驗，激萌片段曝光。
新手媽媽黃翠如發文大爆，為囝囝首次飛行，坦言「幾乎失眠三夜」，終聽取大量媽媽朋友教導，準備奶、玩具、果汁、故事書等「無限裝備」，以備不時之需。不過「蕭哈哈」比媽媽更快適應，出發前幫手「執行李」，拎住啲衫周圍揈。到達香港機場又有得坐「私家車」（可讓BB乘坐的行李箱），一臉好奇咁到處張望，轉頭又獲爸爸蕭正楠孭實四圍行。點估到佢登機前就已經抵擋不住睡意，喺爸爸蕭正楠懷中「熄機」瞓着，即獲黃翠如笑稱盡得蕭家真傳：「點樣都瞓得，這個跟爸爸一樣。」上機後「蕭哈哈」全程安睡，黃翠如與蕭正楠都搭得安心。
而落機後，「蕭哈哈」都叉足電於機場奔跑，有晒活力，又同契哥車上見面，互動可愛。黃翠如透露此行係去探「蕭哈哈」契媽、契爺及契哥，並加上「#馬來西亞哈哈來了」。蕭哈哈超萌影片迷倒大批網友，紛紛留言獲讚佢易湊：「完全唔似第一次搭飛機」、「我個仔有咁乖就好」、「基因咁好真係要努力造人」、「生得好靚仔」、個頭有兩個轉，係聰明仔呀」，令網民羨慕黃翠如同蕭正楠兩公婆。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
