入行24年的視后胡定欣為了重拾17歲的初心，甘願由零開始，以「超齡女新人」姿態勇闖樂壇，更做埋「金主」自資出歌！雖然知名度是新人之冠，她卻對獎項抱隨緣態度，只望有朝一日能夠擁有屬於自己的紅館舞台，更期望跟偶像陳奕迅打造「歌神、視后」的神仙組合。
藝人胡定欣多年來一直專注拍劇集，近年減產的她去年榮升醫生太太後，事業迎來大轉變。她離開合作長達22年的娘家無綫後，以獨立歌手身份全力追夢，近日自資推出頭炮單曲《未知也好》，事事親力親為。她接受東網專訪時，對於被網民封為樂壇「超齡女新人」，她大方表示：「學每樣嘢都係新人，追夢係無分年紀，總之唔好驚難、唔好怕錯就得，好似我做歌手咁，係想帶出想做就做嘅意義，我就係鍾意唱歌，想法好單純。」
她曾兩度登上「視后」寶座，問到可有信心摘下樂壇新人獎？她直言目標簡單又明確：「大家繼續聽、讚我首歌，對我嚟講已經係獎嚟，我唔知、亦冇諗自己有幾高機會（攞獎），但好Welcome大家支持我。」她直言親身參與製作及宣傳歌曲，大量工作已塞滿腦袋，所以沒空間思考獎項事宜，笑言連自己的生日也一度遺忘，而10月3日的結婚一周年紀念，她亦暫時未有構思，生B更是未有計劃。
有指定欣今次出歌，是醫生老公出錢達成其心願，她卻大爆金主另有其人：「嗰個係我嚟，我呢啲獨立女性，點解唔可以做金主幫自己出歌？（投資6位數字？）一定啦，但好開心、好值得，依家好多獨立歌手都自資追夢。（市道咁差仲重本出擊，真係好勇。）2026年啦，再唔做，咁幾時做呀？」她不忘感激老公精神方面的無限支持，並陪她四出巡唱。
搞巡唱攞滿足感
談及單曲正式面世前，她早已在佛山、東莞、廣州及珠海等地開騷，定欣開心表示搞巡唱可謂過足唱歌癮：「其實個場唔係好大，有次我仲企喺台下通道位唱歌，同歌迷只係一手之遙，不過唔擔心保安問題，仲唱得好開心。」問到下個目標是否踏上紅館舞台？她表示早於8年前已在紅館獻唱，雖然只是嘉賓身份，但感覺同樣夢幻，因而更想擁有自己的舞台：「要繼續做，儲多啲歌。（預計用3年時間達成？）盡做啦，唱Live同聽唱片好唔同，好鍾意舞台表演，好多歌手個唱都有捧場，Eason（陳奕迅）唱歌真係好好聽！（想合作？）希望有機會」
問到婚後為何不專心做幸福少奶奶？定欣自言向來熱愛工作，老公亦很支持：「我依然好鍾意拍電影、拍劇，但無綫暫時未搵我。（會唔會因為人妻身份而唔接親熱戲？）未知，遇到好劇本、好角色再諗，開工好緊要，可以生日都唔放假，工作同嫁人係兩回事。」
服裝@maisonmargiela @vann_jewellery
場地:No.5 studio@no5studiohk
本文作轉載及備份之用 來源 source: http://hk.on.cc
|
鍾意就快D Share啦！
|
|
|
