現年76歲的譚詠麟（阿倫）前晚於紅館開騷，揚言已練定200首金曲會歌迷的他，整晚共跳唱了41首歌，精力充沛！面對不少支持了他數十年的鐵粉熱情歡呼，阿倫都不禁動容，哽咽感激歌迷不變的愛！由於阿倫擁有無數經典金曲，令現場逾萬觀眾不時跟着大合唱，回憶滿載，不少嘉賓及粉絲更忍不住哭起來，場面感人！
「樂壇校長」譚詠麟10場《譚詠麟與您「刻骨銘心」世界巡迴演唱會-終極篇》前晚於紅館開鑼，阿倫唱盡靚歌之餘，都不忘搞氣氛，曾拍攝不少電影包括《假如我是真的》、《小生怕怕》等電影的他，笑言自己是被唱歌耽誤的演員，之後連唱多首電影金曲包括《偏愛》、《都市戀歌》和《幻影》等，此外，亦有大跳勁舞演繹《刺客》等多首經典快歌。由於每首皆為家喻戶曉的名曲，陪着不少香港人成長，演唱會大部分時間均變成全場大合唱，台下一眾捧場嘉賓如曾志偉等，跟阿倫的一班鐵粉更邊唱邊流淚，場面相當感人！
面對大家的熱情，阿倫亦深受感動，當演唱《一生中最愛》時一度哽咽，全場觀眾隨即大呼其英文名「Alan」，他感觸表示：「能夠獲得咁多、咁好嘅歌迷咁多年嘅支持，你哋真係『好唔話得』！40幾年前，我已經企喺呢個舞台上，時至今日好多事物都已經改變，唯一我覺得無變嘅，就係你哋，多謝！」
笑歌迷孭書包變孭拐杖
阿倫於騷上透露為了今次演出，特別排練了200首歌曲，希望能滿足歌迷的要求，並謂：「我會盡力而為，但亦會量力而為，因為好多歌迷，我見佢嗰陣時孭住書包，到今時今日好多已經成家立室，甚至孭住拐杖，你話係咪好感動呢？」並希望大家喜歡他所選的歌曲，更揚言：「今次非常可能係譚詠麟喺紅館、香港，最後一次同你哋唱歌，所以希望大家珍惜！」
演唱會臨近尾聲，阿倫表示不設Encore時段，即引來全場「不滿」，他笑說：「知你哋梗係嘈，嘈得好，係冇Encore嘅，但有開心Party繼續。」他返後台換上一套杏色西裝後，再度上台，連唱多首快歌，期間他走近歌迷時，收到寫上「巨款」的大利是，之後他獻唱《80歲後》，螢幕播放AI生成他變成80歲、滿頭白髮的樣子，但被指看上去似藝人郭晉安，阿倫也笑說：「我都覺得似。」最後演唱名作《愛在深秋》，並說：「呢首歌將我帶到全球、有華人嘅地方都認識我！」演唱會於晚上11時35分結束，全晚共唱了41首歌，認真犀利。
騷後受訪時，阿倫回應為備戰演唱會而減磅，他自爆曾經一下子減掉20磅，被朋友及屋企人鬧，擔心影響健康，他之後吃多點東西體重回升，現時整體大約減去15、16磅。今次演唱會行雙主題、雙歌單，所以之後的歌單有8成半不同，提到台上哽咽，他說因看到很多熟口熟面的歌迷，又表示知道台下的曾志偉有喊，取笑對方是喊包，問到是否因為可能是最後一次紅館騷，所以特別感觸？阿倫說：「一來二來好多歌都陪住佢哋長大，一齊經歷成長，有好多回憶……我都因為見到啲人（歌迷）差啲失神，因為太感動喇！」
阿倫指今次演唱會不設嘉賓環節，因不想打攪別人，又表示兩個月前開始練舞，笑言之前練的舞步，很快會忘記，但搞笑自認是「溫拿舞王」。他自評今次演出滿分，他解釋：「我覺得係100分，係畀觀眾100分！」談到將來會否移師啟德開騷？阿倫覺得可以考慮，但要很多方面配合。
鍾鎮濤騷前陪到實 阿倫台上「尋人」
譚詠麟（阿倫）於圈中人緣甚佳，前晚開騷獲曾志偉、鄺美雲、琦琦及陳貝兒等到場支持外，大批巨星好友如張學友、郭富城等亦有送花籃祝賀，而跟他相識超過半世紀的鍾鎮濤（阿B），更由前日拜神開始一直陪住阿倫，更帶同囡囡鍾懿到來見識兼取經。當阿B父女抵達紅館時，亦深受站在紅館外的阿倫粉絲歡迎，二人亦有行到欄杆位置親切地打招呼，阿B步入紅館前更不忘豎起拇指，祝老友Good Show！去到後台，他與阿倫即密密斟，而開騷後，阿倫曾一度在台上多次尋找阿B但不果，阿倫表示是想叫他上台一齊玩。
更多新聞，請瀏覽東方日報網頁：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
