藝人裕美原來是「富二代專業戶」，現跟自稱有逾億身家的前大律師林作拍拖外，入行前已有富家子排住隊追求，更遇過出千萬利誘她「賣子宮」的才俊，還有「另類商演」邀約，總之點頭就財來自有方；而林作為女友平反，大爆月入逾百萬的她，早不是「窮歌女高攀富二代」，更為可以「食軟飯」而自豪。
38歲的裕美7年多前被爆搭上36歲的林作時，因學歷、財力及家庭背景等差天共地，網友剝花生等她被「𡁻完撇」，但二人日前在市價約4,000萬的中半山豪宅接受專訪，林作愛到出口謂：「今年11月1日就係我哋拍拖8周年紀念日。」但裕美卻藐爆：「我唔記得喎，冇7年之癢，同佢一齊後直情反胃，冇晒食欲。」
雖然裕美經常被男友激到翻白眼，但真心覺得林作在眾多富二代追求者中，相處得最舒服。她自言其實最憎與富二代拍拖，原因是：「佢哋不可一世，以為多人鍾意係因為靚仔，其實啲女鍾意佢屋企有錢咋，佢哋醒未呀？」問她是否很多與富二代拍拖的經驗？她直認「十幾個一定有」，還分享未入行時被有錢仔追求的經歷：「我14歲時有個富二代揸跑車嚟接我放學，同佢拍咗一個禮拜拖就頂唔順分手。（點解？）佢成世都未食過漢堡包，飲杯水都要落燕窩，佢分分鐘唔識綁鞋帶，我唔想湊仔囉！」
係唱歌唔係返夜總會
裕美入行24年，見盡娛圈的紙醉金迷及荒誕事，大爆曾被要求「賣子宮」，在公司飯局上被「老闆」當眾侮辱：「有個唔係香港人嘅男人大聲同我講：『你屁股好大喎，畀3,000萬你幫我生仔』，嗰刻好火滾，如果佢唔係30、40歲又好樣，我一巴『車』埋去。雖然咁高價都算有誠意，但我心諗見到錢再講啦，講就1億都得況且我係有原則，又擔心被人『唱』，聽過有錢仔炫耀同女明星拍拖。」林作聞言大嘆未曾遇上這類「筍Job」，自誇「精力」旺盛。
裕美再爆另一宗「秘聞」，指在經濟最困難時，有娛圈出名的「女中介人」邀她離港「登台」，她說：「凌晨打嚟話有臨時Job去澳門陪老闆食飯、賭錢，有6位數，問我可唔可以立即出門口；之後又話去新加坡，不過1個月只可以返香港1次，有幾十萬，氹到老闆開心仲會多啲錢。」只是警惕性強的她感覺太危險而拒「落疊」，加上她不愛應酬，豪氣地說：「聽到『氹老闆』最反感，我鍾意唱歌，唔係返夜總會。」身邊的林作即謂：「咁似『KK樂園』（賣豬仔）嘅。」他又恨到出口表示自己願出外「登台」，自言不怕蝕底。
聽阿媽講唔介意「食軟飯」
問到可相信圈中有「包養」之事，裕美秒說：「信！」更知對方姓甚名誰，並謂：「咁我知佢咩背景出身嘛，突然全身名牌又住大屋咁富貴喎！不過唔會歧視佢，每個人都有選擇，或者佢好需要錢嚟買大量名牌，我唔會阻佢。」林作得知女星是裕美朋友，即不停叫她開名，「八公」本色表露無遺。
談及裕美被酸民嘲諷為「專黐有錢人的心機女」，林作挺身為女友平反：「唔計家族財產，單講搵錢能力同個人資產，佢贏咗我3、4年，裕美做KOL目標係1個月搵100萬！（你有冇自卑？）係夢想成真！阿媽教我要搵個叻過自己嘅女人，有咩事都可以『食軟飯』，同埋我鍾意多經歷嘅女人，佢咁多男朋友，一定係姣婆，好正。」裕美早已成功脫貧，但明言絕不花錢在「算死草」的林作身上，她解釋：「我成日同啲姊妹講唔好養男人，首先搵錢唔容易，同埋啲男人唔還錢之餘，仲可以一腳伸開你。我有今日都要多謝林作媽咪，因為佢阿媽曾經睇唔起我，我先咁發憤！」
更多新聞，請瀏覽東方日報網頁：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
