男神吳卓羲在無綫台慶劇《璀璨之城》夥拍張曦雯「夫妻檔」演出，大讚對方夠醒目，然而談到今次拍攝的最大得着時，他竟然首推是與張智霖再結劇緣，皆因對方計仔多、有諗頭，只可惜劇本改動冇得「鬥奸」！回顧過去經歷「跑唔夠數」、超級透支的日子，他直言想過放棄，幸獲母親點化，捱過困境！
藝人吳卓羲（Ron）受訪時經常將「變化」掛在口邊，表示樂意改變自己迎合娛樂圈的急劇變遷，包括近期首搭林夏薇、在內地接拍每集僅20分鐘片長的劇集《名利遊戲》。不過，有時計劃亦趕不上變化，正如他演出《璀璨之城》，原本劇情交代他與張智霖（Chilam）及姜大衛3父子「鬥奸」，單看牌面已覺好玩，然而開拍後遭煞停，鑑於種種原因只能修改劇本，「從良」的Ron直言：「知道消息後可惜到不得了，之前已經諗定好多嘢準備加入角色人設，後來只能改由Kelly代我『衰』囉！」
問到他有否因此考慮辭演？他打趣表示：「份人工都使咗一截，夠膽唔做？哈哈！其實監製陳維冠第一個就搵我拍，知道有Chilam就更加好，佢喺我心目中係首選（拍檔）。」難怪問到與Kelly結緣是否今次最大得着時，他即否定：「一定係張智霖！」他與Chilam的緣分始於14年前拍攝劇集《衝上雲霄II》，近年再因「大灣仔」而合作綜藝節目，Ron笑說：「覺得呢個人好多計仔，名副其實嘅軍師，好有諗法，好想同佢再拍劇，點知一等就等咗14年。」
提到緋聞女友張曦雯（Kelly），Ron大讚她「話頭醒尾、天生食呢行飯」，但再追問時即落閘：「畀啲空間我哋！」並說：「外邊冇興趣知㗎！（好多粉絲想知。）但我唔想講喎，哈哈！（欣賞佢？）唔欣賞佢又點做我戲中老婆？（現實生活呢？）講完！」
當年古天樂推薦Ron由舞蹈藝員變身無綫經理人合約藝人，其星途自此看似平坦，他卻自爆：「經理人合約可以預支薪酬嘅，簽約首年我根本跑唔夠數，跟住畀人捉去照肺，我問番佢：『我究竟簽邊種約先？公司唔Sell我點會有工作收入呢？』翌年開始，（收入）總算托賴」拍劇經常捱更抵夜，歷盡艱辛，Ron透露最長試過足足7日7夜不能休息，並指當年與前輩劉松仁合演古裝劇《英雄．刀．少年》飾演師徒，捱到最後一日拍攝時，因精神透支導致一直NG，要撐住精神逐句去拍攝。他又提到拍《缺宅男女》其中一場喊戲時，長期陷入崩潰情緒，一度致電媽媽哭訴表示想放棄，其母當時亦哭了出來，但仍鼓勵他堅持，認為作為男人應有始有終，一定要完成手上工作，他憑着這句說話捱到最後，並打消放棄念頭。
逐步打拚換機會
近期Ron開始染指「中劇（單集時長約15至20分鐘的劇集）」市場，他坦言：「都有掙扎同諗過先接拍嘅。（擔心啲乜？）驚拍唔到《璀璨之城2》囉！不過依家製作趨勢係咁，唔適應就會被淘汰，開鏡後我暫時覺得同長劇處埋手法差唔多。」新劇扮演電影投資者的Ron，積極為出事友人尋找真相，見盡娛圈人生百態，他突然有感而發：「我唔作無謂應酬，身邊嘅好友包括黃宗澤同林峯等等，大家都係靠努力，一步一步得到想要嘅嘢，呢個圈係畀鍾意拍戲同藝術嘅人留低，喺我眼中真係唔係外界想像咁。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
