正當這場「爭做傳人兼大婆」的羅生門鬧得熱烘烘之際，已移居珠海的資深演員、龍虎武師及動作指導火星（本名蔣榮發）接受《香港01》獨家訪問，原來火星與Christie去年已正式上契，他開腔力撐契女，不僅揭開Mark生前密謀在佛山開武館的遺願，更親自還原喪禮當晚的實況，指何慈茵到靈堂見父最後一面，但「連鞠個躬都冇」！
揭佛山武館遺願 突發憾事打亂陣腳
談到與Mark的交情，火星坦言兩人相識逾廿載，更共同策劃了龐大的武術及電影藍圖，可惜因Mark突然離世而打亂陣腳。火星接受訪問時透露：「我同Mark識咗好多年，邵氏拍戲已經識。近兩年見得好密，因為諗住一齊喺佛山開武館，我朋友出地方，只係欠裝修，Mark就做教頭教洪拳，我就搞電影訓練班，仲計劃開戲，因為Mark已經寫咗兩個劇本喺手，搵到錢就一齊分....但佢突然走咗，大家都唔想。」
與Christie正式上契 曾催促兩人註冊
火星除了與Mark是好兄弟，原來更與Mark的女友Christie有著深厚的淵源。2025年中旬，Christie正式與火星上契，當時更下跪斟茶，Mark亦在場見證。火星憶述上契經過：「我同Mark每次傾嘢，Christie都在場，咁大家幾好傾，Christie話『咁不如上契啦，你做我契老竇』，當時仲有斟茶，我就封利是。」
對於何慈茵狠批Christie「無名無份」，火星慨嘆自己早已勸過兩人：「佢哋一直冇註冊，我仲叫佢哋快啲拉埋（天窗），但大家又忙，拖拖吓就咁。」
力撐B Boy接棒 做教頭圓遺願
對於Christie早前發聲明點名B Boy為亞洲區第六代領導傳人，而何慈茵亦在FB宣佈自己接任，引發傳人爭議。火星透露契女Christie自Mark離世後經常向他哭訴，但他自言並非「劉家洪拳」的人，對誰接任沒有太多意見，不過他亦認可B Boy的資格：「我冇意見㗎，聽講B Boy都跟咗Mark學武廿幾年，話好勤力同尊重長輩，所以哎吔阿女（Christie）就搵咗佢做第六代，嚟緊都仲會搞武館，應該就由佢接任做教頭。」
指摘何慈茵喪禮如去喜慶：連鞠個躬都冇！
提到何慈茵在喪禮的表現，火星語重深長，好戥故友難過，亦替契女Christie感不值：「佢（Christie）係阿麥老婆，點唔啱都係你哎吔阿媽，但阿麥係你老竇嘛！我依家住珠海，嗰兩日（設靈及出殯）都返咗嚟香港送阿麥最後一程。我嗰日四點幾到，佢（何慈茵）晚上7點左右（先到）。」
本身是基督徒的何慈茵，被火星指責未有在父親靈前鞠躬，並親眼目擊她在靈堂的態度較輕浮，直指未有盡孝道：「佢（何慈茵）話咩做騷俾人睇？咁規矩係咁，做女都應該披麻戴孝啦，嚟同人say hi，去到連鞠個躬都冇！我諗留咗20分鐘左右，同啲人（師兄弟）傾偈打招呼，氹氹咁轉，好似去喜慶咁，仲笑住口！」
問到過去兩年與Mark頻繁見面籌備武館時，有否見過兩父女聚天倫？火星毫不留情地踢爆：「呢兩年我同Mark都行得好密，但一次都未見過佢個女出現。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
