卡域克仍得到唔少曼聯球迷支持。(Getty Images)
曼聯今季成績慘不忍睹，領隊卡域克由上季「救世主」淪為過街老鼠，拖到今日終於炒魷。當曼聯高層高調飛去法國開會，同老闆商討炒領隊同聘請新帥，卡域克呢兩日仍然要返訓練基地開工「等炒」，悲涼畫面連名宿舒米高都睇唔過眼，炮轟曼聯做法殘忍、虐待忠臣。
全世界都知普捷天奴即將成為曼聯新帥，但曼聯拖咗幾日都唔宣布解僱卡域克，呢位曼聯名將喺周二同周三如常返卡寧頓訓練基地，一邊開工一邊等收「大信封」，嚟到周四，卡域克返到基地，逗留148分鐘後，終於收到解僱通知，結束173日執教生涯。
曼聯傳奇門將舒米高表示：「我覺得曼聯嘅處理，對卡域克係非常唔尊重，老實講，我唔覺得卡域克有做錯乜嘢。」
舒米高批評曼聯：「如果曼聯決定另搵賢能，點解唔放走卡域克先？點解仲要佢返嚟帶操練？實在太唔尊重。卡域克都係一個人，仲係一個好善良嘅人，可能係你一生遇過最友善嘅人，點解唔乾脆講分開？因為班高層唔在乎，佢哋唔係曼聯人。我唔係戥卡域克難過，只係見到一間偉大球會咁殘忍對待一個名宿，我覺得有啲火滾！」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
