鍵入藝人或名人搜尋:

載入中…

2013年5月15日 星期三

獨家潛入《玩嘢王》九展假騷 林欣彤後台發癲




我好激動!(真實對白)

錄影完《玩嘢王》,暴瘦林欣彤同專遞整蠱信封的 2010年港姐亞軍張秀文(圖)一齊走, Mag最初死都唔肯爆料,張秀文亦扮嘢話:「我哋只係錄綜藝節目啫!」

封面

獨家潛入《玩嘢王》九展假騷 林欣彤後台發癲

《玩嘢王》上週平均收 20點,與只得 21點的重頭劇《金枝慾孽貳》不相伯仲,但掌聲反應則天與地。

為令節目播出時有驚喜,李思捷一直秘密進行錄影,從未邀請傳媒探班,仲故布疑陣話一早拍完。但本刊收到消息,指《玩嘢王》最後一集會以假「大專 Sing Con」為名,整蠱其中一位歌星評判。上週六( 11日),本刊獨家潛入九龍灣展貿中心 Music Zone,直擊玩嘢過程。第一集被玩的林欣彤,將調轉身份整蠱其他人,更影後上身在後台發曬癲!小巨肺咁好戲,唔通想挑戰嘉欣 BB?

《玩嘢》妹張秀文(電視圖片)

咁都俾你哋影到?(設計對白)

首集被玩

第一集《玩嘢王》中,林欣彤被狂迷死纏,嚇到走夾唔唞!估唔到佢喺尾集會掉轉槍頭玩番人,報仇咁報囉!電視圖片

當正《玩嘢王》係代表作的李思捷,多次自豪地表示會於節目出街前一個月開會做準備,錄影地點亦非常保密,又會提醒有份參與的藝人唔好穿橋,確保出街時夠爆。

做媒觀眾噓爆

玩完人心情大好的林欣彤,臨上的士都笑曬口同記者拜拜。

百密一疏,本刊最近從一個大專學生 fb群組中,得知李思捷會搞假「大專好聲音」歌唱比賽玩嘢。

上週六( 11日)早上 11點,李思捷及一班學生搞手陸續到達九展地下 Music Zone綵排,記者潛入後發現製作十分認真,工作人員多次向台下學生解釋玩嘢過程,其間不斷強調唔可以將相關相片放上 fb。

記者聽見現場有工作人員大聲吩咐:「陣間宣布冠軍時, MC問你哋鍾意邊個,記得叫『 Sunny』(內定冠軍),之後我哋會宣布係第二個人贏,而你哋就要嗌『噓!造馬!』陣間會派啲廢紙畀大家,你哋可以扮激動衝上前掟紙!」

思捷幕後代唱

福祿壽一向拍住上𢱑銀,李思捷忽然退出唔玩,擺明想搞寸 party。《蘋果日報》圖片

準備工夫做到足, Johnson兵團的保安亦確實嚴密。每一位到場的學生,事前需報名參加,入場前亦要用手機出示一張通告表明「自己人」身份。

第一集有份被玩的林欣彤,今次會玩番人轉頭,夾埋蕭正楠和單立文整蠱「民歌王子」區瑞強。據知四人做假歌唱比賽的評判,中途扮意見不合炒大鑊,嚇窒完全唔知發生乜事的區瑞強。

事後林欣彤被記者問起,她死都不肯透露詳情,只爆咗句:「我表現會好激動㗎,你哋到時睇啦!」至於李思捷則會喺後台做其中一個參賽者的幕後代唱,唱得超難聽但竟然贏到冠軍,最後更易容扮大專生上台領獎,玩殘完全被蒙在鼓裏的區瑞強。假騷完場後,記者問區瑞強,他說:「我識咗思捷好耐,都算係佢前輩,估唔到佢會連我都玩!唉,我都知佢有呢個節目,但我見佢成晚匿喺後台,咪以為唔係整蠱緊我囉!」

助導收警告信

要睇林欣彤後台激動發癲,就要等到終極《玩嘢王》先知。《玩》回響咁掂,一向大佬上身的李思捷更加目中無人,連導演都唔放在眼內,據知 TVB一班幕後都私下叫佢「李導演」,「每次拍完一個 shot,思捷第一時間行去睇 playback,導演未出聲,佢已經指指點點,有次導演話有啲位好難剪,佢即刻發爛渣嗌『得啦,咁我今晚自己剪!』同埋試過有個 PA同佢講嘢時態度強硬少少,第二日即刻收警告信,不過佢對女幕後會溫柔好多!」知情人士透露。

而 TVB非戲劇製作總監餘詠珊,週一( 13日)接受電話訪問,唔肯多講《玩嘢王》同李思捷,成把聲沙曬對記者說:「我病咗幾日,唔係好清楚!」

原定今年添食的《福祿壽》,有傳因李思捷打算飛起王祖藍阮兆祥而無限期押後。其實《玩嘢王》得 7集咁大把,而且只係被整蠱的嘉賓爆紅,主持兼度橋人的李思捷就心雄到咁,睇嚟「李導演」要謙啲先得喎!

第 1集: 18點

搵阿 Bob做婚宴主持,中途冧結婚蛋糕又有人搶新娘,仲有親戚當場暈低,考驗阿 Bob執生能力。(電視圖片)

第 2集: 20點

搵馬賽錄靈異節目,其間又玩筆仙又扮鬼上身,嚇到馬賽唔敢鬱。電視圖片

第 3集: 21點

嘉欣 BB扮被玩到喊,實則係夾埋一齊整蠱魔術師 Louis。電視圖片

第 3集《玩嘢王》播出後,嘉欣 BB力憑驚人演技同可憐喊樣大受歡迎,反而李思捷表現普通冇人談論。(網上圖片)

第 4集: 20點

曹永廉、單立文、郭晉安同李思捷鬥向友好藝人借錢,馬明同陳敏之等中曬計,不過單立文問江欣燕一個借得 30萬,爆冷贏。電視圖片

80 U仔做媒玩啲乜?

早 4粒鐘到場,一身便服的李思捷同單立文、蕭正楠一齊綵排,非常認真。

以「大專好聲音」比賽為名,台下 80名學生全部係媒。

林欣彤、蕭正楠、單立文及被玩的區瑞強做評判。

李思捷幕後代唱兼以大專生造型易容上台領獎。

林欣彤與單立文後台扮鬧交,蕭正楠做和事佬。

嚴防玩嘢外洩

《玩嘢王》集集有好橋,除了李思捷及一眾參與藝人夠好戲,玩嘢內容設計細緻及嚴謹亦係成功主因,好似今次假「大專好聲音」歌唱比賽,李思捷就搵埋真正浸大國際學院( CIE)的學生會,由會長 Ernest吹雞,無論台上參賽者及現場觀眾,全是 CIE及其他大專學生做媒。

由於做媒人數多達近 80人,所以《玩》早於大半個月,已在 facebook以 511 Big Project為名開秘密群組,通知參與其中的 40多位同學有關細節,而為免玩嘢內容外洩及防止記者混入,《玩》更要求報名參與同學出示 facebook,以驗明同學身份才批准參與。

據有份參與的同學爆料,《玩》為咗逼真,更要求有份上台扮比賽的同學,早一日到 TVB綵排,製作認真到咁,難怪區瑞強懵盛盛被玩到尾啦!

工作人員在開騷前多次提醒台下學生整蠱細節,仲教埋佢哋如何走位才不會遮到鏡頭,務求唔可以穿煲!

歌唱比賽點可以冇 poster?為求效果好, TVB亦在九展四周貼滿 poster,不少遊人都以為真的有騷睇而入場,同學更要向工作人員出示這張 poster才被批准入場。

為求整蠱內容保密,一班學生搞手就在 facebook開設秘密群組,通知參與同學有關細節。

藐爆張繼聰

由張繼聰同商天娥做主持的《演嘢》,據知原本是由李思捷做肥娥拍檔。「監製本來搵思捷做,思捷最初都 ok,但後來監製想加埋張繼聰,諗住多把口個節目氣氛會好啲,點知思捷一聽到即刻話:『吓,張繼聰又做?咁我唔做喇!』跟住真係推咗唔拍!」話曬人哋都係演藝學院畢業,使唔使咁藐先?



Like我哋 送上熱爆料

Related Posts Plugin for WordPress, Blogger...