掃呢頁CODE去手機

2013年5月29日 星期三

家嫂有計 氹掂「奶奶」 超盈林愛兒一家親




26/5

「迷銅記」後首次與林愛兒(中)一同現身的超盈(右),露黑背心帶拎 2萬 CÉ LINE Luggage袋,行頭仲勁過愛兒媽咪謝玲玲(左)。

真面目

家嫂有計 氹掂「奶奶」 超盈林愛兒一家親

23歲賭王四房長女何超盈自從 3月迷遊銅鑼灣,一度被四太勒令專心學業絕跡夜場,更有傳與原本關係曖昧的林建嶽 26歲細女林愛兒決裂。

以為 80後感情玩玩吓,但實情超盈與愛兒不但未有疏遠,反而經歷「迷銅記」後關係更進一步。

週日( 26日),本刊發現超盈與林愛兒及其大哥林孝賢、母親謝玲玲一同現身中環,其後更坐直升機往澳門,一家親繼續玩。身為何家千金的超盈,全程繑實「奶奶」謝玲玲,又扶對方上機,非常體貼。唔知四太見到阿女孝順人哋媽咪,會唔會呷醋呢?

迷遊事件後,四太刻意公開表示相信超盈,但據知私下其實嬲到震!《蘋果日報》圖片

去年 10月傳出何超盈搭上林建嶽孻女林愛兒,二人經常孖住夜蒲,超盈又曾被本刊拍到到林家過夜,愛兒更在 Instagram上載二人親密合照,寫住「 love of my life」,證明二人關係非常密切。

繑實咬耳仔

週日( 26日)下午 6點多,超盈與林愛兒現身中環擺花街,同行還有林孝賢、孝賢的外籍女友及謝玲玲,似足林氏家庭聚會。當日熱褲襯跌膊長袖衫的超盈,與「奶奶」雞啄唔斷, 30度高溫下企街傾足 5分鐘先肯上車。

眾人分乘兩部七人車直駛往上環信德中心,搭直升機過超盈主場澳門繼續玩。超盈步往停機坪期間,一直繑住「奶奶」咬耳仔,謝玲玲又不時向超盈訓話,似足阿媽教女,超盈更扶實 56歲「奶奶」上機;反而親生女愛兒全程墮後講電話,將媽咪交畀超盈照顧,場面溫馨。

家庭聚會

除咗超盈同愛兒,當日仲有開始中年發福的愛兒大哥林孝賢(右一),他的外籍女友人(左一)及男性朋友(左二)。

「婆媳」啱傾

愛兒先上車,超盈同「奶奶」竟然傾到停唔到,寧願企街都要講埋先。

獲准「守行為」

超盈與愛兒自上年愈行愈埋後十足糖黐豆,經常被影到出雙入對,但超盈今年 3月發生迷遊銅鑼灣事件,事後愛兒不但冇出面力撐,又同其他女伴夜蒲,超盈回應時更劃清界線,「關我甚麼事?唔通每個朋友的事都與我有關?」因而傳出兩人分手,但其實耍完一輪花槍,二人眨一個眼就和好。

據知向來反對女兒與同性拍拖的四太,知道超盈「退燒藥溝減肥藥」出事後非常震怒,一度迫超盈立即返回英國讀書,但超盈苦苦哀求下獲准「守行為」,與愛兒暫停見面。不過女大女世界,加上事隔近 3個月,超盈仲唔放監咩?

新任旅發局主席林建嶽雖然已同謝玲玲離婚,但一家人關係依然密切。

超盈同愛兒經常出雙入對,今次見埋家長,睇嚟打風打唔甩。

「奶奶」錫曬

繑實

行去搭直升機期間,謝玲玲指手劃腳同超盈傾偈。

扶住

超盈扶實「奶奶」上機,愛兒則繼續隨後煲粥。

洗底從良

今年 3月超盈迷遊銅鑼灣,被影到鼻上有白色粉末兼眼神呆滯。事後佢雖然解釋食咗退燒藥溝減肥藥先出事,四太又出聲力撐,但超盈的淑女形象破產。

唔想再激親四太的超盈近日積極洗底,早前聯同二房超瓊及三房超蓮為香港癌症基金拍攝月曆,更唔介意以仙子造型返回事發的時代廣場影相。除此之外,超盈又搵埋幫阿 Sa、超蓮等的著名 stylist馬天佑(小圖)幫手改形象,同黑眼圈遊魂 look講拜拜!

超盈解釋係食咗退燒藥混減肥藥搞到頭暈,但由始至終都冇為嗰笪白色粉末解話。《蘋果日報》圖片

「迷遊銅鑼灣」後,馬天佑為超盈設計仙子 look為慈善月曆拍攝造型,但網友都係認為超蓮靚好多!

超雲爆穀餵新𡃁

至於與陳山聰分手唔夠 1個月的三房長女, 24歲何超雲極速收拾心情搵新目標,上星期更被本刊影到跟疑似新男友拍拖睇戲。

肥爆爆穀 1,030kcal

買完爆穀,翻版 Chilam都忍唔住甜笑,擺明勁冧超雲。

未發現記者,翻版 Chilam不停講嘢氹女,超雲亦相當受落。

新仔爭畀錢

上週六( 25日),一身低胸小背心打扮的超雲,與貌似張智霖的年輕型男到中環 ifc睇《狂野時速 6》,由於入場時超雲未發現記者,兩人不避嫌孖住行,其間新仔更不斷擺出冧樣望實超雲講嘢,經常擺出一副 cool樣的超雲笑到合唔埋口。

早前有傳超雲因為情傷冇胃口而暴瘦,不過有仔陪又唔同講法,趁未夠鐘開場,超雲一支箭衝去小食部買水飲,更唔理超高卡路里買大桶爆穀同新歡慢慢歎,着住 YSL T恤的新男友亦醒目拎銀包找數!散場時,兩人刻意分開走避記者,新男友怕醜到頻頻遮面耷低頭,仲唔認同超雲一齊睇戲,反而見慣大場面的超雲大方企定任影。

新歡後生靚仔又唔使何家大小姐貼錢,表面睇點都好過山聰,唔怪得超雲咁絕情啦!

分頭走

超雲(右)行後門上車返屋企,笑曬答記者問題,反而翻版 Chilam超怕醜,用手遮面。

窮山聰分手後打回原形,搬返九龍灣居屋麗晶花園之餘,更要關楚耀搭路希望同 I.T合作搞時裝。

千金愛自爆

向來愛在微博及 Instagram自爆行蹤的超雲,以前經常將自己與陳山聰的 sweet旅行相 po上網,分手後又上載「 Love=Money」字句諷刺窮山聰靠黐攞着數。聲稱現時單身的超雲,早前叫自己「 Don't lose hope」,週一( 27日)又 po了一張盆栽相,寫上:「種了三日,已經長出小草了……太快了吧」。咦,超雲 3日前咪係同新仔一齊睇戲囉?即係二人已經好快咁「開始」咗喇喎!

27/5爆新戀

13/5有希望



鍾意就快D Share啦!