據報載𡃁妹有 32B上圍，不過呢日見佢就真係冇乜睇頭。𡃁妹雖然平胸，但體形纖瘦，隱約見到腹肌， 29歲嚟講算 keep得唔錯。
真面目
沙灘更 𡃁足 12年 露上癮李綺雯：唔想成世二打六
播咗兩週嘅《情越海岸線》有準「豪嫂」陳茵媺、同李詩韻 BB助陣，收視平均有 26點，最高 28點。不過網友最有興趣原來係入行 12年嘅「𡃁妹」李綺雯，本週三（第 13集）有一幕𡃁妹對鏡頭𠌥身露僭建 C奶，胸壓色誘沈震軒，更是必睇畫面。
週日本刊發現𡃁妹單拖去清水灣遊水，發現佢竟然仲用緊上一代嘅 2G手機。𡃁妹事後接受訪問話入行咁耐月薪唔過 2萬，連 iPhone壞咗都冇錢換，好想上位脫貧，「自己騷唔多但夠食囉，我都唔想成世做二打六，總之有戲做，幾搏都冇所謂。」露點當然例外啦！
29歲𡃁妹李綺雯 01年參加亞視女優選拔賽奪得冠軍，當年最令人記得佢喺出位項目環節，以食蟲（龍蚤）搶分。 18歲入行喺亞視捱咗 5年， 06年得肥監製錢國偉𥄫中引薦入無綫，仲簽埋親生女約，可惜發展麻麻。做足 5年都係三、四線，多數飾演主角細妹。
冇錢換 iPhone
直至最近播映嘅電視劇《情越海岸線》，𡃁妹先情挑黄浩然，本週更以 3對胸墊將 32B穀成 32D上圍，色誘沈震軒，露上癮先引人關注。週日（ 26日），佢仲單拖去清水灣遊水，沙灘上唔少男泳客都認出𡃁妹，對佢眼甘甘。
冇 3對胸墊，𡃁妹即刻打回原形變番「 iPad」身材，畫面當然唔會好似「金毛鈴」（《情》劇花名）咁澎湃。𡃁妹搵到靚位坐低，隨即拎出手機煲粥，記者發現身為藝人嘅佢竟然仲用緊 2G手機。事後記者致電𡃁妹，佢直認最近 iPhone壞咗，一直冇錢買過部新嘅智能手機。
「我平均每月有 15,000蚊收入，而由上年開始亦喺朋友嘅製作公司打工，每月多幾千至一萬收入幫補。通脹咁犀利，總算勉強夠食同基本開支，不過最近壞咗 iPhone就冇錢換，暫時惟有花二百幾蚊買部 2G手機頂住先。」
狂操港版《 Running Man》
𡃁妹做極都閒角，但唔經唔覺 29歲，再等運到唔係辦法。最近無綫想開拍類似韓國 SBS電視台《 Running Man》嘅綜藝節目，當中需要大量真係跑得、運動得嘅藝人，𡃁妹呢日就係去沙灘練水，博個機會。
唔使點熱身，𡃁妹三扒兩撥就遊到出浮台，之後仲蝶式回岸。𡃁妹話：「我知我唔係主角材料，重戲分未輪到我，夠食就算！但我都唔想成世做二打六。總之有戲做幾搏都冇所謂，第時做甘草都得㗎！」
專做細妹
李綺雯入行至今一直被稱呼「𡃁妹」。佢話：「當日喺亞視啲人成日問『呢個𡃁妹叫咩名？』其實我講過好多次，但佢哋都唔記得，我咪叫大家不如就叫我𡃁妹啦！」而𡃁妹喺無綫，亦經常做主角細妹角色。由第一套拍嘅《尖子攻略》做鄧萃雯細妹，同最近《情越海岸線》做李天翔細妹等，一共做過 3次。
多仔溝
李綺雯雖然事業平平，但愛情就多姿多采。最為人熟悉係曾經同前南華球星陳七（陳肇麒）拍拖半年，更跟霍啟剛傳緋聞，而最近𡃁妹就承認同圈外男友拍拖近半年。
|
鍾意就快D Share啦！
|
|
|
