29/10 最後覆診
DaDa上週二（上月 29日）出現中環曾繁光診所所在大廈，表示要減少食抗抑鬱藥，但對自殺傳聞則未有回應。
封面
斷藥暴肥 20磅 復出 DaDa：諗過自殺
陳靜（ DaDa） 3個月前退出娛樂圈，《喜愛夜蒲 3》需臨陣易角，經過一輪潛水，上週又突然宣布復出，本週二（ 5日）身形暴脹的她開記招向公眾道歉。
據 DaDa身邊好友透露， DaDa因為醫治情緒病要食抗抑鬱藥而出現嚴重水腫，加上休息期間食多過做，令體重曾暴升 20磅，抑鬱症發作時更想過自殺，幸好得到好友開解才捱得過。
上週 DaDa現身中環精神科醫生曾繁光的診所所在大廈外，疑似覆診，她向記者承認已開始減藥，家陣雨過天青， 24歲大把前途啫！
- 11月 5日 Dada陳靜道歉記招鞠躬 8秒
今年 8月初，陳靜（ DaDa）突然玩失蹤，單方面於微博宣布因壓力過大要退出娛樂圈，連導演錢國偉正準備開拍的《喜愛夜蒲 3》都要即時換角頂上，經理人施念慈（ Celia）亦要公開「通緝」 DaDa及追討損失。
喊住認錯
不過 DaDa退出只不過 3個月，便突然戲劇性地宣布復出，有指 DaDa喊住向 Celia認錯，及願意將剩餘的 6年合約加至 10年，抽傭比例不變。本週二（ 5日）更開埋復出記招，正式跟經理人施念慈冰釋。
復出一切回復正常，但據 DaDa身邊好友透露， DaDa曾試過抑鬱症發作時情緒失控：「佢嚴重嘅時候會瞓唔到覺，仲同朋友講諗過自殺……曾繁光醫生（精神科）逐個月開啲藥畀佢食，先慢慢康復！」
索爆變肥爆，友人解釋 DaDa事非得已：「係因為 DaDa食咗隻藥會出現水腫，加上佢放咗 3個月假，之前去澳洲避世，啱啱喺泰國華欣旅行又亂食嘢，肥咗成 20磅呀！所以上個月尾開始減藥，要減肥囉！」
而起初聲稱嬲到震要告 DaDa的施念慈終回心轉意，原來全因 DaDa曾拉埋媽咪出面道歉：「其實喺 9月 2號 Celia發出最後通牒前一日， DaDa就搵佢認錯，呢 3個月嚟前後聯絡過 5次，佢仲試過帶埋媽咪去求 Celia原諒添，佢媽咪對 Celia講：『我個女唔識諗』、『帶畀你好多麻煩』之類， Celia見佢咁有誠意，至決定唔告 DaDa同埋再畀機會佢咋！」身邊好友續說。
努力𢱑舊客
DaDa退出前除了《喜愛夜蒲 3》之外，已接下兩部港產片及一套內地片，兼已收了部分片酬；《喜》已由雨僑頂上和新加入許亦妮補位，其餘則要靠 Celia再接洽才能確定是否續用 DaDa；杜汶澤年尾開拍的喜劇則仍然預咗 DaDa。
引退這三個月， DaDa甩底四個代言活動，幸好經施念慈努力解釋，百果園和 spa collection仍願由 DaDa代言，而前藝人姚樂怡本月 17日於新蒲崗 Mikiki Mall搞的商場騷，亦已落實搵 DaDa做聖誕亮燈嘉賓。據知施念慈這次「再接收」 DaDa，為要防止她再潛水，除了加簽至 10年賣身契外，條款亦註明若結婚，必須於 6個月前通知公司等「辣招」，免她搵到好碼頭「閃婚」又唔撈。
由大怒到攬番，施念慈這樣回應：「見佢情緒比之前好番少少，試吓畀佢面對傳媒囉！佢上次太衝動，如果同公司商量吓會好好多囉！（係咪會同錢國偉道歉？）對個個都應該道歉，好彩啲客戶都支持佢復出。」
上週 DaDa宣布復出前，本刊記者發現她步出中環萬邦行，正是其主診精神科名醫曾繁光診所所在，似乎是去覆診。離開時 DaDa表示：「其實一路都減緊藥，多謝關心！」對於藥物可能引起副作用， DaDa就話：「𠵱家都好番好多，最主要係休息嘅，休息咗一段時間。」就匆匆上車離去，未肯回應是否曾經想過自殺。
三個月鬧劇
DaDa由突然退出稱想「回到原來的生活」，到上週復出向施念慈斟茶認錯，三個月前劇情峰迴路轉。
8/8 微博發布
DaDa突然在微博宣布退出幕前：「家庭、情緒、健康和感情問題……我要退出幕前演員工作，回到原來的生活。」翌日再留言：「基於情緒病及心理狀況醫生建議我停止所有手頭上有關幕前的工作……我只想做個簡單的人……有個愛我又只屬於我的男人，着衫隨便但不用暴露……」隨即失蹤連經理人都聯絡不上。
20/8 臨時易角
報道指錢國偉決定由許亦妮代替 DaDa做《喜愛夜蒲 3》女主角。
31/10 承認復出
DaDa暴肥現身機場，表示飛往泰國度假，並承認復出。
仲有機會
DaDa忽然復出，之前慘遭放飛機的錢國偉依然未嬲完，而一直撐 DaDa的杜汶澤則說：「萬一佢再想退出，都要早啲話我知。」人哋唔會無止境畀機會你， DaDa今次要珍惜啦。
揸磚頭儲錢
DaDa陳靜一向食腦，努力拍電影洗𡃁模底之餘，仲識買樓投資保值，雖然現時暫租住西九奧海城，但其實佢有一 400萬細價樓揸手，之前賣長沙灣泓景臺都執 142萬， 24歲女算好勁囉！
|
鍾意就快D Share啦！
|
|
|
