豪語錄
笑 X！點擊過億又如何？ 邵子風
熟悉行情都知，紙媒瀕死，敝集團放眼「動新聞」 views，在追幾百萬數，《蘋果日報》在追幾千萬數；於是我想起網絡紅人邵子風，他的惡搞作品累積點擊過億。
「咁又點？搵唔到食嘅……」邵子風對着空空的餐碟說。
話題太沉重，還是上菜好，雜菌炒蝦，方為我真實意圖——邵子風，歌手龍小菌的緋聞男友，現時與演員蝦頭（楊詩敏）公開拍拖，奇在三人仍合組公司，相濡以沫；果然食家，共冶一爐。
攝錄機在運轉，捕捉當事人即場反應（所以請睇片別只睇書），如同網上真人 show，箇中翹楚怎會唔識玩？邵處之泰然作勢𡁻蝦頭。
但對於隻菌，始終擺唔埋嘴邊，非關厚此薄彼。「你睇，無論形狀、顏色都似！打埋格仔仲似。我惡搞『私煙』都 key過唔少呢類圖。」邵子風說。
他的使命（如果有），就是要令壞人含×。
才盡
點解搵唔到食？邵子風說，早期 YouTube沒有按點擊分紅制度，於是他幫商戶度橋。
「例如餐廳宣傳母親節，我隨口噏，嗱，落場時間，街上搵個金毛飛俾執紙皮阿婆撞親，金毛飛狂鬧阿婆，餐廳經理衝出來，一輪粗口罵退金毛飛。擺上網，香港人鍾意睇講粗口，必定瘋傳，然後傳媒追訪，愈揭愈多經理平時點待客彬彬有禮，仲請阿婆入內食番餐話：『自己要開工慶祝唔到正日，都希望尊敬每一位母親。』咁就變成良心食肆，搞掂！」
以上情節，當然可透過傳統廣告表達，邵子風道破玄機：「大眾喜歡似真又似假的 campagin，商戶寧願設局，慳皮又更具效力。但連我都厭倦造假象去『昆』人，近兩年我沉寂了，說我江郎才盡反而好事，賺咗都背脊骨落。我做經理人，自然搵唔到大錢。
「昨晚睇林榮基（銅鑼灣書店店長）上電視，我和朋友打緊以色列麻雀，我話：『如果我係本土派，就暗殺林榮基，屈死對家。』」
他連本土派也信唔過，活在陰謀論年代，「子風」自非原名。「辛苦多年，求鬼神，師傅話改咗名就行運。」乃至年齡，《維基百科》寫生於 1962——不可能吧，鬍鬚兀突卻皮光肉滑。「以前冇人問起，到有人問，我話你睇《維基》啦，讓我保守年齡秘密。」
愈少披露個人資料，與安全有關，畢竟得罪人多。
改過
邵子風便不能認真嗎？
邵子風認真地說：「祖籍福州（網上射歪自稱潮州佬），爸爸是知青農民，志願做作家，來港撈地產代理，成世未出過一本書。他知道我想做喜劇演員，便鼓勵我。
「我小時候做過教育電視童星，中學起報讀香港電影學院，以為紅褲子出身，放棄港台 PA一萬月薪，三千蚊轉職電影場記，一心一步一步爬上去，到馮德倫首次執導《大佬愛美麗》，我當上副導演，但一步之遙那麼遠，馮德倫是明星，條路就係唔同。
「到爸爸過世，有晚夢見他問我：『怎麼你的理想愈走愈偏了？』我做不成導演，也做不成演員。我很挫折，自此患上躁鬱症，至今都怕咗自己發脾氣的破壞力。」
比較起來，網上創作是解渴捷徑，邵子風更曾成為貿發局創意代言人，後來不是了，因為作風愈來愈反建制。
「我做人態度就兩個字『笑×』，不能 cut走個×字，而且冇固定 object，可以笑×某人、某事和自嘲。
「作為地道香港人，我諗，近十年但凡稍有良知的人都會變得反建制，我家經歷過樓市爆煲輸身家。」
若讀者硬不信他累積點擊過億，因為大半屬「商演」（即上文所述的設局）。「創作了也不能認。」但邵同時自豪唱過《惡晒航空》，那會嚇怕（包括其他）商業機構的。「被職工盟收錄在工運唱片。總要有啲態度，如果唔係太等錢使嘅話……
「我公眾形象欠佳，正如我也痛恨周永恒，但早排行內人大頭 B病逝，一直在床邊為佢唱歌打氣的就是周永恒，我親眼見——為什麼周永恒不 highlight這件事？抑或傳媒只喜歡 highlight家暴？咁點解有個曾經牽涉家暴的男星，現在成了影壇搶手貨，大家又自然跳過舊事？幾壞的人都可有改過機會，所以我推掉很多呃人的 campagin，今年會同蝦頭演雙人舞台劇，實踐番理想。」
雜菌炒蝦
自選成功之作，他舉龍小菌蒙面。「意念來自阿菌自己，戴面具是令聽眾專注音樂，脫面具是因為有個聾的 fans，令阿菌知道歌手畢竟要照顧全方位。我像副導演幫手這兩次行動。」
道理講得響，但艷星陳靜宣告息影時，邵子風譏諷：「退出可以做幾單，復出又可以做幾單。」迅即被網民反抽：「戴罩（指龍小菌）可以做幾單，脫罩又可以做幾單。」
邵子風這天說：「我道歉，不為什麼，只因我睇漏陳靜患上抑鬱症，我都患過，應該體諒別人。」
嗯，龍小菌，曾經是邵緋聞女友，現況加上正印蝦頭合組三人公司。「一個是朋友，一個是公開承認拍拖，就係咁簡單，我認識蝦頭更早。公司冇助手，感情好到有時阿菌幫蝦頭借衫，有時蝦頭幫阿菌借衫，大家又知嗎？」
中箭
正如「陳靜事件」，放箭者難逃背後中箭。爆出菲律賓比立勤大學賣學位醜聞（事涉港姐蔡思貝和嶺大副校長），邵子風亦被揭在 fb「鬼祟」刪除在該校的學歷。
「記者打來問是否讀過是否刪除，我正在入𨋢，答咗兩句『係』，之後我再覆電話和發聲明，就冇咩人理會。
「要說的是，我認真地讀，亦不覺得教的人不認真，工商管理碩士課程幫到我，學費唔貴，我貪平。咁與此同時它可能賣緊學位，我收到風即刻刪除，因為我可能是受害者。我亦從沒拿這學歷見工啊。
「 OK，總之到開 show時，我開場白會自嘲：『 Hello，我係蔡思貝嘅師兄！』」
貪靚的邵子風在本刊影樓出鏡前修剪鼻毛，筆者嘆道：「以前主編美容版，起過《鼻毛可避》這條爛題。」邵說：「現在講 fashion顏色會寫沉默是金、新奇是橙。」
唉，舊橋也罷新橋也罷，資訊爆炸，很快一律 out——究竟還有沒有雋永的價值？
邵子風說：「創意會老，觀念不會老，例如公義。我舉報朱主席（那位與彭家麗合唱的疑似騙徒），只怪我表現方法較輕佻搞笑、太花生，大家當睇戲咁睇；但有位行內前輩在 TVB化妝間拍我膊頭說：『你做的是一件好事，而且是娛樂圈少人敢講的。』」
台灣作家李敖說，罵一個人王八蛋很容易，證明一個人王八蛋很難。邵子風說：「所以我罵人都列出證據，而且預咗被反過來摷黑材料，好彩我盡量誠實，不偷雞摸狗。」他被影到雙黃線泊車。「咁雙黃線泊車係唔啱。」
更無奈的是，將《可惜我是水瓶座》改成《可惜我是水喉匠》，都變舊歌了。「但鉛水事件仍未見官員負責。」
哭笑不得
諷刺時弊，但邵子風不算在政治立場走上最前線，流於小情小趣 punch line了。
「我在金鐘瞓四十幾日街，離開，是收到實質警告，包括對我身邊人，具體嘅。這一兩年少咗政治表態，你話小情小趣，係，我的確卻步。男兒天職保家眷，林榮基自言較少負擔，夠坦白，佩服他勇敢，我撫心自問做唔到，我唔夠薑。」
店長口齒不算伶俐，有力量的訊息，原來不用 punch line，筆者看新聞看得哭了。
「你仲可以哭，我仲可以幽當權者一默，這些權利可能好快冇埋，十年八年後回看，已經是一種幸福。」
然後的後記
沒料到這樣。
邵子風志願是喜劇，《豪語錄》相約他也本為一笑，沒料到話題畢竟躲不過……
網絡昌明，卻令從事者更迷惘，令世界更真假難辨，都有點事與願違。
送邵子風離開，他車牌 TM64××，可唸成「他媽六四」——投來的？「係。」我用 forum口啓揶揄：「有閒錢投牌，不如捐助民主運動？」邵說：「所以其他人問起，我會答隨機。」
事後，他傳給我一張停車場即景照片，密雲中的太陽；另一張是我疲倦的背影——被惡搞專家偷拍到可手尾長，好彩模糊不清。
邵子風留言：「係希望！」 Internet像潘朵拉盒子，愈翻愈亂，卻留給我們表達和溝通的希望。
撰文：余家強
攝影：黃志明
攝錄：葉志明
髮型： Stephen
化妝： Mon Cheng@Annie G. Chan
服裝： Noveltylane
|
鍾意就快D Share啦！
|
|
|
