媽咪姐
多年積怨 杜汶澤勁藐溫兆倫冇品
近年北上搵食嘅溫兆倫，可能完全忘記咗自己係香港人，早排竟然喺微博呼籲各位香港傳媒唔好再搵佢喎！正所謂癲開有條路，近日佢不停喺微博發布愛國論，更連人帶 IP舉報一啲「反愛國」嘅網友，即刻被圍插，仲令杜汶澤忍唔住爆粗鬧佢：「 X樣！」
嗱，阿澤不平則鳴，大家都知！但佢唔妥溫兆倫就唔係今時今日嘅事嘞，大家記得俾溫兆倫 hurt得好深嘅陳梅馨（現名陳明君）嗎？兩人 93年撻着，據知拍拖期間，溫多次向陳借錢唔還，分手後，溫生仲面皮厚到向陳追索 14萬拍拖使費！而陳明君同阿澤前度顏仟汶係深交知己，所以仟汶同阿澤都聽過唔少溫生嘅事跡，講真吖，真係好難唔鄙視囉！再講，阿澤同溫兆倫喺 06年一個演藝人協會活動上碰過頭，當時佢哋仲「唔覺意」發生撞膊事件！
不過最令阿澤火起嘅，應該係因為月前溫兆倫喺微博 post過自己已故爸爸嘅相，仲話原來個樣好似「杜汶澤哥哥」，又話：「難道我爸當年他跟……哈哈！」向來最錫媽媽嘅阿澤梗係即時喺網上發炮：「再搵我老母講笑我打 XX你！」媽咪姐只想講，溫生你係咪食得國內黑心食品太多呀？個心變曬色喎。四個字，好自為之啦！
微博起浪
48歲嘅溫兆倫近年主力喺內地拍劇，不時 post啲愛國相呀文呀上微博，仲做埋「金手指」，你頂得住無？
前度力撐
離開娛樂圈多年、喺西貢開餐廳嘅顏仟汶，表示不屑同溫兆倫扯上任何關係：「對呢種人不如算啦！希望佢尊重自己尊重人。」而問到佢有冇同阿澤聯絡時，仟汶大方話：「依家各自有一個美好家庭，以前啲嘢無謂講啦！我只想講阿田（田蕊妮）做倀雞英真係好好睇、好入戲。」
|
鍾意就快D Share啦！
|
|
|
