公然挑逗
強國女仔果然招數高， Liddy在眼鏡舖多次採取主動，旁若無人挑逗彭順的下巴，𠱁得男方極冧。
打頭陣
微博發聲明 李心潔心太軟 放生豪賭爛滾老公
「鬼後」李心潔導演老公彭順，日前被斷正與 26歲𡃁模李悅彤 Liddy又攬又啜肆無忌憚。據本刊得知，彭順與 Liddy已暗撻大半年，早於今年 1月尾，本刊拍得彭順偕 Liddy到銅鑼灣買眼鏡，其間二人不時情深對望，情到濃時女方更𢭃男方的下巴。
向來爛滾兼豪賭的彭順，原來有鋪專溝細廿年嫩模癮。 07年與當時只有 18歲的邦民女 Kama斷正上酒店房，及後又先後力追 JM文詠珊及「動漫 Maggie」李曼筠，而每次「穿煲」，他都自動向老婆投案。彭順今鋪斷到正一正，周一（ 26日）他極速飛返大馬箍煲，但據知李心潔今次終心死，更兩度發了「離婚」短訊給對方。不過死剩把口的彭順，幾日後成功𠱁番老婆。周三（ 28日）黃昏二人聯名發聲明，婚姻似有轉機。偷食男遇正執迷女，彭順又成功過關。
「他一直包容我，令我明白愛一個人很簡單，就是希望對方快樂。」李心潔多年來一直視彭順如「偶像」般愛慕。難怪彭順多次偷食，李心潔事後都選擇原諒。周三傍晚（ 28日），李心潔和彭順在微博發聯名聲明，李心潔在言語間，似因為愛再次心軟原諒偷食老公，令全城嘩然。
銅鑼灣𢭃下巴
屋企有一個愛自己的女人，可惜彭順多年來從冇珍惜過。上周五（ 23日）彭順被斷正與𡃁模李悅彤 Liddy在圓方商場旁若無人攬啜。
據知，二人其實已行埋大半年有多，而且感情穩定，並非玩玩嚇咁簡單。早於今年 1月 27日，本刊便拍得 Liddy陪彭順到銅鑼灣買眼鏡，起初二人都顯得避忌，在店內隔開一張櫈坐，更不時頭擰擰看看有冇熟人，但很快二人就「忍唔住」愈坐愈埋。
其間，彭順每試一副眼鏡，都問 Liddy意見，更不時扮鬼臉冧對方，逗得今年 26歲的 Liddy陰陰嘴笑。之後二人又情深對望十幾秒，情到濃時 Liddy更𢭃彭順下巴，親密關係不言而諭。
升呢公屋妹
今年 26歲的 Liddy，生於湖南，隨家人來港後定居青衣邨公屋。 09年入行簽約 Az Pro.Ententanment拍節目《耳分高下》擔任 SING之天使「檸檬」一角，同年拍青春劇《南華夢飛翔》撻著羅鈞滿。 Liddy其後轉戰樂壇，但演藝事業依然毫無起色。暫時最「輝煌」成就，便是做小三撻著人夫彭順。
微博挑機
Liddy做小三不久，即在微博放上合照，擺明挑「正印」機。去年 11月， Liddy在泰國拍戲，彭順以「男主人」身份肆無忌憚飛去同女友慶生，冧女冧出面。
介紹女友拍戲
據知彭順與 Liddy於去年 9月在友人飯局中認識，兩人很快便打得火熱。一直等上位的的 Liddy更有意無意向彭順透露「想試嚇拍鬼片」。為免「上身」，彭順只介紹給徒弟導演黃柏基，擔正做驕陽電影《四非》女角，夥拍周柏豪。電影於去年 11月於泰國開拍，據知彭順更多次飛泰國探班，並以「男主角」身份陪 Liddy出席劇組聚會，更主動為女方慶祝生日。 Liddy更悄悄把相 post上微博，向男友「正印」挑機。
彭順原本和李心潔租住大坑一愛巢，但近年彭順獨自搬到西營盤的高逸華軒，方便他和小三 Liddy幽會。知情人透露：「 Liddy出名主動，好識電人，佢之前同羅鈞滿拍過一陣散拖。不過嫌對方幫唔到佢，之後佢開始黐埋導演堆玩。佢同彭導幾乎一撻就著，彭導以往玩得小心，但對住 Liddy就冇曬符，俾條女上曬身都制。佢哋依家都發展到半同居階段，就知呢個女仔唔簡單」
過大海豪賭
火麒麟周身癮的彭順，除了「偷食」唔抹嘴，還有鋪過大海豪賭癮。早前本刊便影到他孖住細佬彭發，到澳門賭廳玩百家樂。知情人透露：「唔止百家樂，佢幾乎逢賭都啱。呢期佢就鍾意玩 Poker（德州撲克），每鋪過萬蚊，一晚上落十幾萬，如果輸得好甘，佢就鍾意磨爛蓆唔願走。」
結婚四年，李心潔與彭順對外經常曬甜蜜幸福。但本刊收到消息，李、彭夫妻關係近一年已由濃轉淡。經常留在大馬老家照顧繼女的李心潔，只會出席廣告活動才會現身香港。但留港期間，卻選擇上好姊妹梁詠琪的半山寓所借宿一宵，而非到大坑老公的寓所。
偷食男脫罪
今次彭順偷食東窗事發後，身在大馬湊女的李心潔隨即離開老家玩失蹤，更在周日（ 25日）缺席當地一個佛學講座避見任何人。因此周一（ 26日）彭順飛大馬箍煲曾試過摸門釘。但口才了得的彭順，最終𠱁掂老婆出聯名聲明。李心潔執迷不悟，偷食男又再一次脫罪，唉……！
彭順齋噏宣言
四年前，彭順拖著李心潔步入教堂，許下婚姻承諾。可惜一直搣唔甩爛滾本色，一次又一次令身邊人受傷害。愛的宣言頓變愛的笑話。
‘心潔為咗幫我湊女，留港三年，當時佢事業衝刺期，加上我又去咗美國拍戲，佢為我犧牲可想而知，所以我絕對唔會辜負佢，會愛錫佢。’
‘人間有愛，只要有愛就乜都唔使驚，我會以雙倍嘅愛回報番佢。’
‘我鍾意心潔，當然想佢開心，我哋試過分開五日，之後發現唔可以冇咗大家，所以決定喺番埋一齊，當時我同心潔講：『呢五日換回我哋嚟緊嘅五十年』。’
專嗒嫩模
幾多歲嘅男人都鍾情嫩口女仔， 48歲彭順當然唔例外。據知他對年輕廿載嘅嫩口𡃁模特別有興趣，導演果然識食。
拖 Kama上房
07年彭順被傳媒拍到和邦民女 Kama上房，幸得當時仍未結婚的李心潔力撐：「我相信佢！」斷到正一正，李心潔依然當冇事發生。自此，彭順溝女更加肆無忌憚。
JM派檸檬 Maggie嫌老
拍開鬼片的彭順， 08年忽然開套青春片《愛鬥大》，搵江若琳、 Janice Man和動漫 Maggie李曼筠孭飛，有指彭順忽然改戲路，是以拍戲為名溝女為實。一劇組人透露：「彭導有份搵呢套戲嘅女角，我哋都傳得好行，話佢開套咁嘅戲，全部用曬新女，都唔係志在票房㗎啦。佢喺片場成日捉住 Janice Man隻手話教做戲，我哋知佢私下約過 JM單獨出去，但人哋冇睬佢囉！據聞之後佢就轉約 Maggie，但都食檸檬， Maggie私下同工作人員講，話嫌導演老！」
票房慘淡
彭氏兄弟於 99年首執導泰國電影《無聲殺手》入行， 06年電影重拍他找來荷里活巨星尼古拉斯基治及楊采妮主演，票房勁收約 4千萬。 02年他的《見鬼》在港票房也逾千萬，全球總票房更逾億，可謂一鳴驚人。但近年，兩兄弟所拍電影，無論量和票房都下降，票房都不足千萬。
|
鍾意就快D Share啦！
|
|
|
