掃呢頁CODE去手機

2014年5月30日 星期五

[忽然1周 983] 驚拖累世界盃 秘斬 5集馬騮膠劇 MW,




號稱由《魔戒》班底打造嘅強國版《西遊記》,演員冇人識,特技特別爛、劇情狂派膠。識睇,梗係唔會睇呢啲囉!

媽咪姐

驚拖累世界盃 秘斬 5集馬騮膠劇

媽咪姐成日都話,觀眾眼光係雪亮嘅!我哋 C9仔嘅力量更加唔可以睇小!唔使講啲乜,就講大台恃住有慣性收視,加上唯一對手變咗「無限翻播台」,就是是但但買埋啲強國膠劇《西遊記》返嚟播。以為點都會有人睇啦,噢, sorry!依家個世界變咗嘞,我哋 C9仔識上網追韓劇、美劇、日劇,再睇埋人哋啲高質綜藝節目好似《 Ranning Man》咁,都不知幾多選擇。呵呵,嚟緊仲有世界盃㖭!無可能睇呢隻硬膠孫悟空,硬食呢套山寨版《西遊記》嘛!收視救極都死,是常識囉。

所以呢,據知大台見《西遊記》播咁耐就拖累黃金時段收視咁耐,觀眾已經習慣轉台,愈諗愈驚會影響埋 6月中播世界盃嘅收視,到時真係唔知點同一班廣告大客交代!撐唔住之下,當初大大聲話唔會腰斬膠劇嘅大台,已經諗緊偷偷哋由原本播 50集, cut到變 45集,臨時推馬明擔正嘅《寒山潛龍》喺 6月 30日開播,希望借佢嘅 C9殺手魅力,搶番多少收視。不過大台高層下令唔好俾準備 cut劇消息洩漏出去!計媽咪姐話,點都好,拍好啲劇仲實際

寄望世界盃

大台以往播世界盃,有絕對優勢,今年佢仲揼本派黃翠如同洪永城去南美、歐洲拍《走過足球聖地》,諗住贏曬其他台。但隨住講波台柱「阿叔」離世,《西遊記》拖垮埋慣性收視,即使表面幾口硬,都要諗對策, cut短膠劇,救得幾多得幾多!

膠劇陸續嚟

繼《西遊記》後,大台啱啱又用成 450萬高價買入連強國人都彈到七彩嘅《步步驚心》第 2集《步步驚情》。雖然吳奇隆同劉詩詩喺上集戲假情真又收視高,但《驚情》劇情變得騎呢又鬆散,大台又中伏!

膠劇全城插

《西遊記》自 4月尾開播,話咁快就收到 6百幾宗投訴,大批網民鬧爆,有學生仲趁有傳媒去學校採訪,舉牌要求腰斬《西遊記》。《蘋果日報》圖片

《寒山潛龍》頂上

上年開拍嘅《寒山潛龍》,原本由馬國明、陳茵媺擔正,但陳發現有咗而辭演,由林夏薇頂上做女主角。大台仲加咗陳自瑤色誘馬明等重口味情節(圖),唔知幫唔幫到俾膠馬騮推冧嘅收視呢?

由大台節目部總監何冠中推薦,集團總經理李寶安(右圖)拍板播嘅《西遊記》一播出就全面負評。搞到要朱凱婷同宋熙年喺《東張西望》唱雙簧,猛讚《西遊記》好睇,令網民鬧爆,話要向廣管局投訴,大台急急喺 MyTV中刪咗呢段「維穩片」。



鍾意就快D Share啦!