2014年7月4日 星期五

[忽然1周 988] 走出去!說出來!風雨中抱緊自由! 何韻詩 譚小環 黃秋生 秋生,譚小環,何韻詩,黃秋生,MW,




媽咪姐

走出去!說出來!風雨中抱緊自由!

唔知由幾時開始, 7.1唔單止係一個假期,仲係一個追求民主自由嘅約定!媽咪姐同大家一樣,俾 689呢個政府一再挑戰底線:雙非襲港、假普選、洗腦式國教、港視不獲發牌,一單接一單。跟住大概想推高遊行人數,「反口白皮書」殺到,再有吳亮星粗暴通過東北發展前期撥款,夠喇!我哋真係受夠喇!









今年 51萬市民上街遊行嗌口號,曬完又淋完,淋完又再曬,任由警察點樣封路,我哋都決意向前行!好多之前唔理政治嘅明星藝人都上街,行到身水身汗,都堅持撐落去。正如媽咪姐有個朋友仔喺 fb話:「可唔可以唔好 7.1維園見?」可以揀,邊個唔想趁住假期同屋企人聚嚇,嘆住冷氣食西瓜?只係逼到埋身嘞!要改變未來,就要趁現在。

何韻詩  fb發功

何韻詩:成個社會氣氛愈嚟愈團結,為我哋香港去發聲,希望可以爭取一個無篩選嘅真普選!

黃耀明:見到好多人,覺得好開心,大家都開始希望香港好,因為香港衰咗好耐喇!

遊行當日,何韻詩同黃耀明一齊喺「大愛同盟」嘅街站嗌口號,之後一日仲 post柳俊江嘅留言,話學界佔中嘅被捕學生無食物,仲要硬曬 5個鐘。阿詩即刻鬧爆話虐待,又提大家唔好「三分鐘熱度」。

譚小環 港姐出山

譚小環:近一年覺得香港好似變咗,尤其之前喺立法會吳先生(吳亮星)粗暴通過撥款,令我覺得要用自己雙腳行出嚟,盡香港市民嘅責任。

黃秋生 一直關心

唔講嘢唔舒服嘅黃秋生,一直𥄫實 7.1遊行發展,不斷更新 fb,連報道片段都睇埋,仲寸警察俾「學民」代表問到口啞啞㖭。

葉蘊儀 肥菜無懼

有報道話葉蘊儀喺 7.1 post咗張布滿黑遮嘅相,話:「我希望用信念和行動來改變未來!」但後來刪咗。媽咪姐以為「肥菜」受壓縮沙啦,但佢原來係要換相!後尾就 post咗好幾張佢嘅遊行相,呢棵「肥菜」好硬淨!

龍小菌 寸爆「正苦」

龍小菌:香港係要由我哋香港市民一步一步咁建立起嚟,安定繁榮唔係口講出嚟㗎,梁振英!

龍小菌除咗喺 7.1集會上寸爆 689,後來又喺 fb分享影片,認為應該有 130萬人參與遊行,但「正苦」應該會「唔認數」!

無行都有 say

丁子高︰身邊有好多朋友參加遊行,每個都有唔同訴求。其實政府有啲嘢未必解決好,會累積咗啲問題,令到每個市民都有好大反應。好似我同老婆嗌交,唔可能永遠都係我贏,一定要大家攞到平衡去解決問題。

莫可欣:有諗過去(遊行),但最後都係驚人多,公投就有參與,我 22號已經投咗票。我有好多朋友都去咗(遊行),我諗唔止 51萬人參加。我覺得香港依家好亂,唔係我認識嘅香港,唔啱小朋友成長。我會考慮遲啲送囡囡出國讀書。

馬詩慧:我同囡囡都有參加公投,不過老公就冇,佢係鬼佬吖嘛!我好 proud of being香港人。 7.1正正代表香港精神 never die!對佔中,我其實好矛盾,因為如果唔係有人 making noise,究竟當權者仲聽唔聽意見呢?



鍾意就快D Share啦!
Related Posts Plugin for WordPress, Blogger...