[忽然1周 990] 婚前驚魂 B哥哥回鄉卡現微博 MW,

B哥哥同范姜生咗 9歲嘅鍾懿同 4歲嘅鍾幗，佢哋不時向父母催婚，難得由前妻章小蕙所生嘅大女嘉晴亦好接受范姜。呢次婚事，絕對係皆大歡喜。

媽咪姐

婚前驚魂　 B哥哥回鄉卡現微博

呢排娛樂圈喜事真係一單接一單，啱啱講完古巨基終於肯結婚，跟住梗要數埋 B哥哥鍾鎮濤同范姜素貞呢對患難見真情嘅準夫妻！佢哋下個月 25號就會喺峇里結婚，結束 17年愛情 long long run，恭喜晒呀。

其他影片：>>半山築愛巢　 B哥哥范姜下月峇里完婚

不過喺呢個開心嘅時刻，竟然俾媽咪姐發現有人 post咗 B哥哥張回鄉卡上網！裏面有晒個人資料，好危險啫。媽咪姐即刻搵 B哥哥助手問吓，佢好淡定咁話：「可能係返大陸做嘢嗰時，俾咗啲回鄉卡資料攞批文，所以先流咗出嚟。（驚唔驚洩漏個人資料有危險呀？）唔驚嘅，我哋成日返去做嘢，好難避免，有唔少明星嘅回鄉卡都喺網上見到㗎。」唉，強國嘅嘢，又真係防不勝防嘅， B哥哥下個月做老襯，仲有成頭家要養，惟有自己小心啦。

早幾日，范姜（中）同 B女嘉晴（右）去名設計師鄭兆良嘅中環工作室試婚紗，樂也融融㗎。《蘋果日報》圖片

內地網友 post咗 B哥哥回鄉卡嘅彩色影印本上網，仲叫人「猜猜是誰」。嘩，好大膽喎！ Btw， B哥哥個英文譯名好 cute囉。

鍾意就快D Share啦！

下一篇 》