手持有力證據
自上周本刊率先爆可嵐遭家暴要離婚後，她與老公尤子威即成追訪對象。手持老公躁證的可嵐再爆大鑊，指尤子威大陸有小三外，今年 4月更迫她墮胎。
滾熱辣
再爆大鑊 深圳二奶小玲曝光 可嵐：我大肚佢已有女人
上期本刊獨家踢爆女歌手可嵐被打四年，但原來家暴只是揭幕戰，日前可嵐再指老公尤子威今年 4月迫她墮胎及多年來在深圳搞婚外情，家事愈揭愈臭。
本刊獲得深圳二奶小玲發給尤子威的多個曖昧短訊。可嵐直認早知二奶的存在，她說：「我大肚佢已經有女人，生完個仔佢仲成日去深圳。」
被指扼殺了一條無辜小生命的尤子威，周三（ 16日）主動聯絡記者指被屈：「我哋（與可嵐）有商量過，呢啲嘢（落仔）係冇得迫！」本刊更獲得多段可嵐跟丈夫爭執的錄音對話，躁底老公不斷以粗口辱罵可嵐，足以證明尤子威拒絕再照顧兩母子，相當無情。
可嵐（ Colleen）上周含淚撕破一家三口的幸福面具，向本刊承認被打多年，日前再提供一段與丈夫在家爭執的短片，以及多段被對方粗口問候的電話錄音，可見她與尤子威的婚姻生活早已危危乎。
小三死纏唔放
身心受傷的可嵐，一直知道丈夫在深圳收埋二奶。據知情者透露：「嗰個女人叫小玲 Seline，結婚前 Tommy（尤子威）已經成日上深圳搵佢，有時仲過夜。後來 Colleen有咗迫住結婚，初時我哋以為 Tommy已經甩咗個女人，點知仔都生埋， Tommy上深圳仲密過以前，個女人仲大膽到試過落嚟香港，去到元朗搵佢。 Colleen一早發覺老公有唔妥，每次睇到嗰啲肉麻短訊都好傷心，不過為咗個仔佢都啞忍。」
本刊記者就曖昧短訊上顯示的電話號碼，周二（ 15日）致電居於深圳的小玲，對方以流利的廣東話接聽。
記：你係咪認識 Tommy？
玲：我哋識咗好多年。
記：有指你係介入佢同可嵐婚姻嘅小三？
玲：吓……好似唔關我事，我哋已經冇聯絡。
記：你哋有冇拍過拖？
玲：（沒有否認）呢啲嘢你問番佢（ Tommy）
記：你有冇發過曖昧短訊俾 Tommy？
玲：好耐好耐之前嘅事喇！
記：係咪 2011年發生？當時可嵐生完仔喎！
玲：我依家過緊新生活，唔關我事。
這 4年間，小玲還不時在微博抒發掛念男友之情，可見她的確曾周旋於可嵐夫婦之間。
產後被迫行房
可嵐更手持與老公尤子威多次爭執的錄音對話，躁底老公不斷以粗言穢語辱罵她。本刊記者聯絡現時身在內地工作的可嵐，她說：「個女人喺結婚前已經出現，佢（ Tommy）話同佢斷咗纜，但婚後一直有來往。到生完個仔就更加離譜，我聽到佢哋傾電話。佢（ Tommy）仲同我講好鍾意個女仔，每次嘈交，佢就借啲意上深圳搵個女人。我日頭要湊仔，夜晚要落舖幫手，有次真係好攰，拒絕咗佢嘅性要求，佢竟然話『你唔俾我搞，咁我去叫雞囉！』」
可嵐更驚爆早前被迫墮胎，「佢班朋友好多都有兩個細路，係佢話想要，所以我哋一路都冇避孕。到今年 4月有咗，佢就好決絕咁話要落咗佢。」可嵐稱在診所完成墮胎手術後，老公尤子威付錢後即離去，忍心她獨自歸家。
堅稱冇第三者
被千夫所指的尤子威，周一（ 14日）於元朗街頭接受本刊記者訪問。他多次強調從沒出手打老婆，談及囝囝由誰照顧時，他更忽然在街頭流淚。其後記者問及是否曾有第三者出現，尤子威即時無語及多次擰頭，最後才細細聲答：「冇。」
至周三（ 16日）可嵐再公開被迫墮胎及老公有小三的證據。尤子威即主動聯絡本刊記者，改口風表示小玲是其前女友。對於迫老婆落仔一事，他辯稱「我哋有商量過，我冇迫佢（可嵐），呢啲嘢（落仔）係冇得迫！個胎喺佢個肚度，我哋有冷靜傾過。其實搞咁多事出嚟咪又係為錢。我梗係俾人屈佢一路都話有避孕，如果冇咪出句聲，我用安全套囉！佢錄我音一定係早有部署，係陰濕。（可嵐口中嘅小玲，你認識嗎？）……小玲……係我以前女朋友嚟！（咁你有冇講過話唔俾你搞就叫雞？）冇！」
尤子威聲稱墮胎是經二人商量後才決定，但在 WhatsApp中顯示，他在得知可嵐懷孕後兩小時便叫她搵醫生把孩子打掉。一段破碎婚姻，再加家暴，沒有一個贏家，最受傷害是無辜的兒童。
小三微博示威
這 4年來小玲不時在微博發放來港的照片，以及向男友講出感性的心底話。
爭執聲帶 自爆欠債 300萬
可嵐提供的 3段錄音聲帶，都是與老公尤子威在家發生爭執時的錄音，尤更自爆欠債 300萬。（想聽錄音足本請睇片）
5月 30日 唔要個仔
在這段錄音聲帶中，可嵐問尤子威為何要鬧兒子，對方即以大量粗口回應：「我冇話要，你咁叻你自己照顧佢囉！點解要我養。 X家鏟，生來做乜？」兩人互相對罵後，可嵐問尤子威：「你打我又好威咩？」尤繼續鬧：「走囉！ X家鏟、 X街、死乞兒……」
6月 2日 拒絕照顧兩母子
二人最初冷靜地商談分開的安排，可嵐問尤子威是否想搬走及離婚，尤直認：「我唔想同你一齊！（咁交俾家事法庭處理！）唔使判！我唔會要（仔）你想要錢咪告囉！我仲爭三百幾萬，不如分一半債俾你，銀行卡數七萬幾，分三萬俾你！你乞 X人憎、我唔 X理，我搬 X走咗你食屎業主問你拎租，睇你點 X樣安排，我冇 X錢俾；電費我冇 X錢俾，你咪睇吓中電點 X樣安排囉！」另一錄音是二人同日在家猛烈爭執，清楚聽到可嵐不停尖叫狂呼。尤子威就承認正在屋內狂擲東西及踢爛物件。
|
鍾意就快D Share啦！
|
|
|
