【佢都係為食女】LuLu寸爆0靚模剝衫墊煲底：好似過街老鼠咁
2014-07-16 12:56:00
五十步笑百步嘅LuLu。攝影:馬建華
LuLu去書展？出波膽寫真呀？幾時呀？？？？冷靜啲，係就係LuLu，不過係王璐瑤嗰個LuLu。今年佢唔係出寫真，佢嗌悶喎，今年出食評書。下？食家？原來佢都係「為食女」嚟0架？
LuLu今日谷胸到書展宣傳佢本處女食評書，佢話喎:「好開心書商請我嚟呢度，呢啲機會唔係個個有0架 !有啲0靚模出咗寫真都要鬼祟入嚟，似好過街老鼠咁，唔知匿咗喺邊。」嘩，呢啲係咪50 steps laughed at 100 steps？
LuLu再謂:「我呢個幸運係理所當然嘅，因為我本書有內容有文字，唔係齋剝，唔係睇完拎去墊煲底。」聽過你之前都出過兩本寫真喎……LuLu話:「出咗兩年寫真，好悶，想正面啲，唔只係識剝。想有番少少內容。」點說服人你食家呀？佢就話:「我想用少女角度出發，而且我喺香港生活咗廿幾年，可以推介俾外國人香港有乜嘢美食。」
今次本書介紹九間食肆，LuLu話遲下返內地宣傳，仲有內地食肆斟佢寫書兼拍埋片，遲下整番個飲食平台——聽住先啦。
睇番佢本新書先啦，出書基本法唔止有內容，仲要有校對，但LuLu呢本就冇，咁難免有錯字啦。LuLu解釋:「我都有請教中學老師，因為啲字簡單，所以冇搵校對囉。」佢又話第一版印兩萬本，有信心賣得晒。
今日LuLu嘅身份係…食評人。
低胸sell書
有年就同龍心夾計喺書展上演大龍鳳，扮俾佢嚇親。
啲戲幾好…,可惜俾龍心本人踢爆咗佢哋根本係夾計嘅囉。 (資料圖片)
|
鍾意就快D Share啦！
|
|
|
