掃呢頁CODE去手機

2014年10月9日 星期四

[FACE 385] 見財化水 阻拍大陸劇 蔡少芬怨無綫斷米路 蔡少芬,MF,




蔡少芬提起被 TVB hold住檔期時,講到皺晒眉勁無奈,陰功!

真面目

見財化水 阻拍大陸劇 蔡少芬怨無綫斷米路

TVB出名人工奀又刻薄,二三線藝員做極冇發揮,一線小生花旦劇接劇冇得抖,個個捱到怪病纏身。

付出同收入唔成正比,林峯、陳法拉走得快好世界,爭住北上賺人仔,以為淨係「親生仔」被折磨,但原來同 TVB仲有兩套劇合約的蔡少芬同樣受害。現時主力在國內搵奶粉錢,蔡少芬本來有機再同神劇《甄嬛傳》班底合作,接拍古裝鉅製《羋(音:美)月傳》,可惜 TVB一早 lock住年尾檔期又遲遲唔開工,令蔡少芬要推劇遷就,見財化水!「 hold住先」作風, CCTVB肯定係跟 689學

蔡少芬賺人仔賺唔停,老公張晉又做埋金像獎「最佳男配角」,事業愈來愈順,難怪一家四口咁幸福圖片

4年前的《甄嬛傳》在中港台爆紅,劇中一班演員如「甄嬛」孫儷、「華妃」蔣欣紅到癲,原本在國內冇乜叫座力的蔡少芬,憑奸到出汁的皇后一角,極速搶佔內地市場,登台廣告商演湧住嚟,保守估計已袋了 2千萬落袋!

方中信頂上

《甄嬛傳》班底今年再開拍另一齣古裝大製作《羋(音:美)月傳》,導演更預埋蔡少芬一份做主角,再同孫儷鬥餐死。可惜蔡少芬的檔期被 TVB霸住,搞到原本可以食住條水繼續狂賺人仔的大計即時玩完。

冇蔡少芬做皇后,劇組索性搵了另一港星方中信頂上做皇帝,雖然兩人大纜扯唔埋,不過據知鄭曉龍(《甄嬛傳》導演)睇中方中信在內地的知名度不斷上升,而且始終有粒港星坐陣有助賣埠,即使方中 sir開價 30萬一集,大導依然搶住用。

《羋月傳》上月開鏡,除了孫儷(上圖)同方中信(下圖)有份外,國產男神高雲翔亦獲邀加入,而《甄嬛傳》中的皇帝陳建斌、「槿汐」孫茜都會參與。

網上圖片

網上圖片

孫儷(中)同蔡少芬(右)因拍《甄嬛傳》成為好友,兩人不時喺微博交流湊女經,可惜今次《羋月傳》(小圖)無緣再合作。

網上圖片

網上圖片

網上圖片

飾演歹毒皇后的蔡少芬,唔只豬籠入水,仲攞獎攞到手軟,早前成為華鼎獎「最佳女演員」,好過做啲 cheap雞視后

「推咗唔少戲!」

TVB原本搵咗蔡少芬同陳豪年尾開新劇,後來忽然將該劇改為鬼片,令身為虔誠基督徒的蔡少芬反感拒拍,檔期亦一拖再拖。《蘋果日報》圖片

上月尾(27日)出席活動時,蔡少芬被問到冇得拍《羋月傳》時,都忍唔住同本刊狂呻 TVB阻人搵食,她說︰「其實劇組有搵過我,我都好鍾意鄭曉龍導演嘅戲,而且成個班底又好熟,今次合作唔到真係好可惜。(檔期唔啱?)我同 TVB仲有兩套劇合約,之前有部劇本來會開工,佢哋臨時又改成鬼戲,冇辦法,推咗好多工作,𠵱家應該 10月開!(搵少好多錢係咪好可惜?)可惜呀,因為推咗唔少戲,都有好幾部!」蔡少芬現時拍劇廿萬一集起跳, TVB咁樣霸住個期,點賠番幾百萬奶粉錢俾人先?

港劇算罷

對上一齣幫 TVB拍的劇集《金枝慾孽貳》收視仆直,相反《甄嬛傳》同樣係古裝劇,但製作、劇本、演員陣容都比大台劇強一千倍,更紅到台灣、日本、美國等地,身為其中一個主角的蔡少芬,自然升價百倍,人氣勁過唔少一線內地明星!

密接商演

網上圖片

蔡少芬的「皇后」身份在內地號召力強,平均每星期都北上做商演,遠至天津、哈爾濱的主辦單位都肯出高價請佢做嘉賓。

劇集搶手

拍完《甄嬛傳》後,美女芬相當搶手,先後拍了《西津渡》、《山河戀.美人無淚》及同「輝京」朴海鎮主演的時裝劇《爆米花》。



鍾意就快D Share啦!