上週六（ 4日）敏之婚後返港心情大靚，雖然老公依然喺另一閘口走先，不過敏之都話：「佢好低調，我要迎合番佢！」
真面目
阿太整餅 峇里擺酒 豪包賓客 陳敏之開餅鋪延期造 B
近年藝人結婚、生仔都已經好主動發相、邀請採訪，不過就好低調，上週三（ 1日） 35歲陳敏之正式與拍拖十年、 42歲的雷偉信（ William）在峇里結婚！雖然敏之在社交網站都只係發單人婚紗相， William半面都見唔到，不過睇新娘個樣都知有幾幸福！
其實自 03年敏之爸爸離世後，敏之揹起成頭家， 10年重病死過翻生，已經認定 William為結婚對象，加上 William在今年初敏之的生日飯局上跪地求婚，仲送埋過百萬的三卡巨鑽戒，敏之終答應婚事做雷太！
上月 20日敏之受浸成為基督徒，上週三（ 1日）完成人生大事成為雷太，至本月底，敏之將在天后開設曲奇餅店，人生第一次做老闆娘。「好多嘢自己做，有試味有整，要自己整先知咩味，用咩材料！個罐嘅設計都有參與。（老公有份？）冇㗎！唔使啦，自己搞掂。由細到大都好鍾意食曲奇，所以試吓創業，人生第一個生意。」嚟緊陳敏之更會做番歌手出碟，造 B睇怕都要排吓期先喎！
外地結婚邊個豪？
現今好多情侶都會選擇旅行結婚，一來唔使喺酒店、酒樓做場大龍鳳，二來外國環境靚啲，感覺都高尚啲嘛！不過出國觀禮就唔係個個都做到宴請賓客。
今次敏之去峇里結婚，就豪花 7位數字，請咗廿幾位好友、工作人員，機票、住宿、飲食，總之就係全包宴玩足 5日 4夜，難怪與敏之同機返港的維維、伍姑娘等人都笑晒口。
剛於 8月底，都係喺峇里結婚嘅鍾鎮濤就唔係咁講，據講每位賓客要自費機票之餘，仲要每晚比近 6千蚊住鍾家指定酒店， 4日 3夜每人就使咗二萬幾蚊！
35歲的第一次
向來都以 44吋長腿做生招牌嘅敏之，除咗演得之外， 99年佢其實係憑住小室哲栽徒弟之名入行唱歌先嘅，不過唱片唔賣得， 01年就簽約大台索性做藝員拍劇，一拍就拍足 13年。
直到今年，敏之於 9月 20日受浸成為基督徒， 10月 1日國慶之餘仲結埋婚，月底又話開餅鋪，年尾仲想趕出碟做番歌手，真係有心唔怕遲。
唔講唔知，原來敏之好鍾意整嘢食，嚟緊月底，敏之就會同幾位圈外朋友合資，喺天后開佢人生第一間曲奇餅店，敏之仲講到明自己會落手落腳去搞，所以餅店開張後，大家都有機會食到敏之親手做嘅曲奇餅喎！
請邊個去峇里？
敏之喺圈內唔算多朋友，但同親佢 friend嘅都真係堅交心，所以今次婚禮要請啲咩人都唔使點傷腦筋。
據知敏之較早前已經通知咗蕭正楠同埋麥包，佢哋 friend底應該大家都知，可惜家陣搵食艱難，蕭正楠要去吉隆坡做活動，而麥包就要為新劇《樓奴》埋位，想去都無得去，不過敏之話返到香港會同親戚、朋友再食多次飯，至於為咗何超雲而同陳敏之反目嘅陳山聰？梗係 no way
|
鍾意就快D Share啦！
|
|
|
