掃呢頁CODE去手機

2014年10月9日 星期四

[FACE 385 外地娛樂] 咒到你死 MF,




早前日本舉行本土恐怖片民調,結果《咒怨》系列竟然打低《午夜凶鈴》及《鬼來電》,成為日本國民心目中 No.1恐怖電影系列;而今次《咒怨 3》女主角佐佐木希,亦因為覺得呢個電影系列夠經典,就算驚鬼都接拍。

東瀛團

咒到你死

萬聖節臨近,最近晚晚喺電視見到羅蘭姐夾埋夏蕙 BB扮雙頭怪嬰,老實講搞笑多過驚嚇,如果真係想驚餐飽,不如睇套恐怖片好過。

同《午夜凶鈴》齊名的日本經典鬼片《咒怨》,事隔 11年重出江湖推出第 3集《咒怨:死結的開端》,今次除長髮女鬼伽椰子施展奪命喉音嚇破膽之外,最令人意外係一直電影、電視起雙飛的玉女模佐佐木希竟破天荒首次主演鬼片,仲化身「絕叫女王」同班寃鬼玩對抗。對抗有理,𠵱家香港人應該日日都咒緊同一個人,恐怖程度拍得住鬼片㗎!

《咒怨:死結的開端》

上映日期: 10月 9日

佐佐木希去到曠課學生俊雄屋企後,發現俊雄變成白面仔,仲被封鎖於房間內,就係因為衰多事,惹來殺生之禍。飾演白面鬼仔嘅 10歲童星小林颯,兩歲已出道,演戲好有經驗。

佐佐木希點解會處女下海拍恐怖片?

《咒怨 3》內,佐佐木希飾演小學 miss,因見學生俊雄曠課,於是走去做家訪,結果搞到被鬼纏。

其實係導演落合正幸睇中佐佐木希拍《咒怨:死結的開端》,事關導演覺得佢個樣好靚而且眼大大好可愛,如果一個又靚又可愛的女仔被鬼嚇到花容失色,肯定博到觀眾同情,於是着手游說佐佐木希參演。而一向驚鬼的佐佐木希,一直都避開唔拍恐怖片,但經導演多番游說,加上覺得《咒怨》是鬼片中的經典,唔想錯過機會,於是頂硬上破例演出。

拍攝期間有冇遇到怪事?

除佐佐木希外, 22歲《 ViVi》混血𡃁模 Triendl玲奈亦有扮學生妹,因八卦走去俊雄間鬼屋探險,卒之被鬼玩謝。

拍攝時佐佐木希一直專注於現場演出,所以沒有為意周圍發生什麼事,但拍完返屋企後便出事,佐佐木希自爆:「每次回家後都瞓唔着,但當瞓着時即『被鬼壓』,有時半夜驚醒時只要諗起恐怖畫面,即控制唔到心跳,而且就算見到屋企裏面嘅洗衣機、微波爐都令我聯想起一幕幕恐怖場面,真係好得人驚。」

幕前卡士強勁,幕後班底都唔弱喎!

11年前由酒井法子主演的《咒怨 2》,由日本恐怖大師清水祟執導,但新一集清水大師升做監製,所以改由執導過《催眠》同《感染》等恐怖片的落合正幸操刀,更與《咒怨》及《午夜凶鈴》製作人——瀨隆重聯手撰寫劇本,三劍合璧,誓要搾乾觀眾膽汁。

今年 6月尾,導演落合正幸,帶埋佐佐木希同飾演白面仔俊雄嘅童星小林颯,一齊出席《咒怨:死結的開端》記者會谷宣傳。上映時,電影公司曾偷拍觀眾反應,唔少日本妹嚇到掩面尖叫。

隔 11年先拍《咒怨 3》?

11年前,當時仍然係玉女嘅酒井法子都做過《咒怨 2》女主角。

上一集《咒怨 2》已經係 99年嘅作品,之後又拍過荷里活版,有指原本電影公司打算於 5年前搵第 2集女主角酒井法子拍《咒怨 3》,點知當年法子因吸毒要暫退藝能界,加上原本拍開的大師清水崇因升呢做監製,所以搵咗好耐先搵到落合正華合作,最後要押後到今年先推出。

踩埋入《香港 3D奇幻世界》?

早前,騎呢剝模仙樂(左)都帶埋師妹蘇小小去《香港 3D奇幻世界》谷戲,但搵着佢哋造勢真係得啖笑囉!

最近電影《咒怨》與在尖東希爾頓大廈舉行的《香港 3D奇幻世界》美術展玩 crossover,館內可見到《咒怨 3》中,女鬼伽椰子破牆而出嘅 3D立體畫,驚嚇程度更真實。



鍾意就快D Share啦!