女神 Kay網上人氣不用懷疑，由佢孭飛嘅劇集，應該會吸引大批巴打睇大台。
真面目
處女演出 張繼聰推薦 謝安琪空降大台做殭屍劇女一
《吸血新世紀》瘋魔全球， 98年萬綺雯套《我和殭屍有個約會》講到𠵱家，證明殭屍片種收得，一向「跟得貼」嘅 TBB又點會執輸。據知大台下年將會開拍一套殭屍片《殭》，仲搵嚟高登女神 37歲謝安琪孭飛，又話會揼本去到荷蘭拍外景。
為隆重其事，大台於 11月嘅節目巡禮騷，人妻 Kay仲會做頭炮表演嘉賓兼宣布做女一，據知人妻 Kay今次拍劇全靠老公推薦。不過張繼聰就好謙咁講：「阿 Kay係一位實力嘅表演者，佢唔使任何人推薦。」人妻 Kay拍劇有冇長腿睇先？
大台因為世界盃蝕錢，搞到要裁走兒童組 50人，而今年節目巡禮亦受影響，唔會再好似以前咁洗錢，整個蚊型騷了事，講真啲劇集離不開幾位小生花旦，今次最爆就係搵到謝安琪拍劇。
據知謝安琪下年將拍一套殭屍片暫名《殭》，劇中仲會做索殭屍，聽講撮合 Kay佔領 TBB做女一，原來係老公張繼聰向監製陳維冠推薦，如今 Kay答應拍劇，在 11月的縮皮巡禮中， TBB更安排 Kay有個人騷兼宣布拍劇，好尊重咁款！
雖然今次張繼聰帶挈老婆拍劇，但佢就對本刊話：「拍劇呢啲你自己問佢啦，阿 Kay係一位實力嘅表演者，佢唔使任何人推薦。如果有人搵佢拍劇，係佢自己本事，唔關我事。佢工作嘅事你問番我老婆我唔知喎！（會唔會夫妻檔一齊做？）！唔想夫妻檔囉！我覺得唔好睇喎！同埋我哋一直好少講公事，如果一齊拍劇，我覺得好怪囉。」巴打都未必想睇你兩夫婦幕前耍花槍喎。
縮皮巡禮
以前大台節目巡禮，例牌晒冷，尤其劇集預告一定扮大製作，播足半個鐘。但今年有傳余詠珊、曾勵珍兩位阿姐不和，劇集預告將會轉形式，唔會再有預告片，改為以相取代。皮已縮，但大台廣告費當然繼續加啦。
余詠珊（左）、曾勵珍（右）不和，據知珍姐全綫封殺余詠珊愛將，而余詠珊亦喺節目巡禮大幅削減劇集預告。
《搞鬼辦公室》
原先由蔡少芬孭飛，但因為題材講鬼辭演（張太係基督徒，另一個張太謝安琪又接《殭》嘅？），最後由田蕊妮頂上。
《當鐵馬遇上戰車》
小生走得就走，造就袁偉豪上位。第一次擔正，拍唐詩詠、蔡思貝，無錯又係蔡思貝。
|
鍾意就快D Share啦！
|
|
|
