掃呢頁CODE去手機

2014年11月12日 星期三

[FACE - 390] 收錢出聲 收 40萬內定入決賽 王菀之:呢啲唔算錢! 菀之,王菀之,MF,




週日( 9日),王菀之回應本刊說:「嗰啲唔可以話酬勞,只係啲梳頭化妝嘅 cost。」嘩,你啲妝頭都好貴喎!

真面目

收錢出聲 收 40萬內定入決賽 王菀之:呢啲唔算錢!

G.E.M.參加湖南衞視歌唱比賽《我是歌手》一唱成名,之後騷價幾級跳,開騷、代言,掘金都掘到手軟。

有個成功人辦,唔少香港歌手都心郁郁想搏吓,就連「林雪」王菀之都諗住分一杯羮,突然殺入廣東電視台嘅《麥王爭霸》,風頭蓋過一開始參加的泳兒添!忽然空降,據聞電視台開出 40萬高價利誘,仲優待王菀之,唱 2集就直接入決賽,不過廣東台珠江頻道係廣東話節目,同擁全國數億觀眾嘅湖南衞視級數何只差幾皮。

雖然王菀之𠵱家歌影視三棲發展,不過唱歌先係本業,喺大台新劇《老表,你好 hea!》,仲同最近勁 hit嘅蔣志光合唱〈相逢何必曾相識〉。網上圖片

雖然以廣東話播放的《麥王爭霸》,暫時受全國關注程度遠不及《我是歌手》,不過嚟到第四季照樣吸引一班香港歌手如泳兒、洪卓立、關楚耀等參加,而一向唱得嘅泳兒仲成為節目嘅人氣王。

高姿態登場

上週六( 8日)嗰集《麥王爭霸》,王菀之翻唱陳奕迅〈傷信〉,唱到七情上面,連評判肥媽都話聽到眼濕濕,有啲誇囉!網上圖片

至於節目早前就傳出泳兒同洪卓立是內定的四強人選,洪卓立隨後發聲明,以有工作撞期為由退出比賽,最終香港代表得番泳兒同關楚燿。原本泳兒都坐定粒六,不過有傳主辨單位出到 40萬高價力邀王菀之,喺本月 1日,節目的第十集空降出場,頭場四位監製仲一致給予高評價,原本人氣王泳兒被搶盡風頭。到上週六,王菀之第二次出場,唱完 Eason的〈傷信〉後,更直接打入決賽。

「嗰啲唔可以話酬勞」

同 Alex Fung馮翰銘識咗 10年,王菀之唔少 hit歌都係由 Alex監製,今次《麥王爭霸》啲歌又係由 Alex重新編曲,擺明幫王菀之上位。《忽然 1周》圖片

上週六( 8日),雖然泳兒繼續冧莊,不過四位評判明顯一致勁 buy排第二的王菀之,兩人齊齊打入 22日的決賽。

週日( 9日),王菀之出席活動回應:「係 Alex(馮翰銘)推薦我,因為有四個監製,佢就梗係出動佢嘅愛將啦。(今次酬勞好高?)呢啲唔算錢,唔可以話係酬勞,只係啲梳頭化妝嘅 cost。(搶晒泳兒風頭?)冇搶風頭,泳兒唱〈如沒一次〉都好多 fans讚佢,唔同樂迷鐘意唔同嘅音樂,兩個風格好唔同。(有傳內定冠軍?)每一個比賽、頒獎都好多流言蜚語,我係唔會聽嗰啲嘅。(有內地報導話你寸泳兒唱得細聲?)唔係,我係驚個音樂大聲得滯,遮住泳兒把靚聲呀。」會唔會唱〈相逢何必曾相識〉先?

真人騷激鬥泳兒

王菀之只係玩咗 2集就順利進入決賽,泳兒就一路由低慢慢爬,仲要一下子被搶盡風頭。網上圖片

泳兒雖然喺《麥王爭霸》一路都攞到幾高分,但王菀之出場之後,風頭被搶走。網上圖片

王菀之突然空降《麥王爭霸》,電視台仲以佢同泳兒的頭像設計成對決海報搞 gimmick。網上圖片

立立退出

原本洪卓立都有份玩,但忽然被指內定四強人選嘅傳聞,洪卓立即時發聲明,以工作撞時間為由退出比賽。網上圖片

歌手出場時,其他參加者就會坐喺間觀戰室睇,有內地報導指王菀之曾經喺泳兒唱緊嘅時候,話佢唱得太細聲,聽唔清楚。網上圖片

內地忌囂張

G.E.M因為參加《我是歌手》一炮而紅,原來賺人仔都可以賺到手軟,不過最近就有指 G.E.M寸嘴兼得罪人,結果被文化部列入封殺名單,有傳除之前獲批文的演出可如期舉行外,之後嘅商演、代言等活動都一律被禁止。網上圖片

原來內地寂寂無名嘅 G.E.M.,因為參加《我是歌手》而成名,之後騷價幾級跳。不過最近網上流出一張文化部最新的黑名單,從未表態撐佔中的 G.E.M.都被列入其中。無端端被封殺,實情主因都係衰大牌,態度變囂,不過, G.E.M.都仲係得 23歲,大把時間拆彈嘅!



鍾意就快D Share啦!