第一日開咪的利嘉兒着住海綿寶寶黃色戰衣同鄭啟泰返工，節目做足 2粒鐘都冇食過一粒螺絲，久休復出狀態唔錯！
真面目
忽然復出 抑鬱 4年復出開咪 利嘉兒：諗過自殺
利嘉兒自從 08年同港台前副台長周國豐離婚後，慢慢退出幕前，直至早前為 DBC數碼電台記招現身撐場，又自爆曾被大台男高層迫去飯局，大家先記得呢位「普通話專家」。
出山開咪做主持，現年 39歲的利嘉兒原來 4年前已再婚，老公更係從事製造業生意的有米商人。事業愛情再起步，但利嘉兒亦曾試過患上情緒病，失控狂喊狂笑，又內分泌失調，嚴重時更諗過自殺！好在近年已經康復，仲做埋闊太，咩抑鬱都冇晒
冇笑談普通話 7年的利嘉兒，本週一（ 10日）開始為 DBC數碼電台記開咪，同鄭啟泰主持新節目《告士打道 3號》，主打娛樂潮流話題，一星期做足 5日。
輕度抑鬱又喊又笑
復出頭炮唔衰得，利嘉兒早前在記招就率先玩自爆為節目造勢，「嗰陣有高層叫我去飯局，推咗幾次唔去就突然冇晒嘢做，經理人話個高層講明唔用我！聽聞呢個人搞嘅飯局有女同事出事，搞到差唔多要報警！」
被人玩謝，利嘉兒一度情緒出現問題，本週一，她接受本刊訪問說︰「嗰陣做緊《笑談普通話》，我發現我嘅情緒好唔穩定，試過做緊訪問突然又喊又笑，嚇到個記者都呆咗，同埋嗰段時間狂爆瘡，情況維持咗兩年左右，覺得唔對路睇醫生，原來因為壓力太大令內分泌失調同輕度抑鬱，有時仲會閃過想自殘同自殺，好在冇付諸行動！」
「老公生意都幾大！」
經歷過事業低潮同抑鬱症，利嘉兒 05年同港台前副台長周國豐高調結婚，當時因老公關係請到黎明、劉德華等巨星到場，可惜 08年離婚收場，婚姻 3年玩完。
好在利嘉兒 4年前搵到第二春再婚，老公比前度周國豐更巴閉，「我同佢識咗十幾年， 4年前結婚，佢係製造業，生意都幾大！」後來再在節目中自爆同老公的婚禮細節，「我哋係喺日本結婚，請咗 60個親朋戚友出席，佢哋淨係需要俾個 passport no.，我哋就幫佢出埋機票訂埋嘢。婚禮當日我同老公扮成兩個日本明星出場，佢仲特登買咗個金色假髮同白西裝添！」老公有錢又浪漫，又真係幾值得曬命嘅！
爆 TVB前男高層迫去飯局
利嘉兒早前自爆被迫去飯局，誤傳該大台男高層係已經轉去 now Tv做製作部經理的何麗全。利嘉兒週一（ 10日）否認當年受何麗全迫害及雪藏，但就唔肯開名揭曉謎底：「唔係你哋識嘅人嚟㗎！我知網上好多巴打絲打估緊係邊個，但我可以好老實講，唔係你哋估或者識嘅名字！」
回晒春喎！
今年 39歲的利嘉兒，冇做幕前一排依然 keep得到，而且近睇比早年更加精神飽滿！除了由瓜子下巴變咗蝦餃下巴，鼻頭亦明顯較以前有肉，加上蘋果肌相當搶眼，真係回晒春喎！
|
鍾意就快D Share啦！
|
|
|
