上周三（ 5日），素顏謝安琪同老公一齊去買珍珠奶茶，全程繞到老公實一實，順便騷埋部金色 iPhone 6+！
真面目
大紅人 兩公婆玩晒 謝安琪扮殭屍拍嘉穎 張繼聰男一攀楊怡
冇錯！又係《老表》，雖然收視得嗰 25點，不過無可否認，多得班忠實師奶捧場，唔少好戲又靚聲之人因此鹹魚翻生，除咗蔣志光，仲有識得用對波猜枚嘅張繼聰。
冇錯！一樣係大台，林峯走完輪到杏兒走，不過小生花旦走夾唔唞，亦造就有「志」之士攝位上！繼謝安琪落實處女拍劇擔正《殭》後，最新消息係張繼聰連接兩套新劇，為做男主角連唱片都放棄唔再出！明年夫妻檔齊齊入「主」大台，仲有邊個敢話張繼聰係廢柴？
唔到你唔認，電視劇入屋威力的確無窮！歌星出身的蔣志光要靠套《老表》話俾人知佢其實識唱歌，而演藝學院畢業嘅張繼聰亦都係靠《老表》提醒全港市民，其實佢好叻做戲！難怪一早在樂壇晉升天后之列、亦已成功打入內地市場的張太謝安琪明年都要回歸，向大台獻出寶貴第一次：夥拍鄭嘉穎主演新劇《殭》。
大茄翻身
自從搞大 Kay肚、 07年奉子成婚，張繼聰一直因為事業發展不如太太惹人話柄。全靠兩年前得祖藍招攬有份演出《老表，你好嘢！》，戲劇功底和搞笑天份再受注目，劇接劇成為大台監製新歡。
雖然套套唔係擔正，不過《食為奴》、《忠奸人》、以及出緊街的《老表，你好 Hea！》套套搶眼，總算捱出頭來，下個月開鏡的《收規華的良心》更升呢做男一，高攀花旦楊怡做對手，而另一套明年初開拍、由《使徒行者》監製文偉鴻操刀的《大情大性》亦被 mark做男主角。據悉，無心插柳拍劇入屋加上唱片業難撈，張繼聰索性放棄歌手事業全力拍劇。今次總算發圍振夫綱！
唱匠收容所
香港唱片最輝煌年代早成過去，早在張繼聰之前，出碟難撈歌星改行拍劇的大有人在。視帝鄭嘉穎、靚聲王蔣志光以外，電視台還有好多收容例子，總之鬥長命有朝一日靠劇力反攻入樂壇。
|
鍾意就快D Share啦！
|
|
|
